«Сёння мы падводзім вынікі рэалізацыі праграм у 2025 годзе і абмяркоўваем перспектывы на 2026-2030 гады. Магу сказаць, што да гэтай нарады мы падышлі з добрымі вынікамі. Зараз дзейнічаюць саюзныя праграмы, прысвечаныя найбольш актуальным пытанням навуковай, навукова-тэхнічнай і інавацыйнай дзейнасці. Гэта мікраэлектроніка і фатоніка, даследаванні касмічнай прасторы і біятэхналогіі. І калі для даследаванняў космасу, мікраэлектронікі і фатонікі ёсць канкрэтныя вырабы ў метале, якія ўжо былі запушчаны на арбіту, то праграма „Саюз-Біямембраны“ яшчэ прывядзе да значных дасягненняў як у медыцыне, так і ў іншых сферах», — падкрэсліў Уладзімір Каранік.

 

У далейшых планах — стварэнне новых матэрыялаў, вырабаў, якія будуць павышаць рэсурс касмічных апаратаў, стварэнне айчынных кампанентаў і абсталявання для мікраэлектронікі, якое павысіць узровень тэхналагічнага суверэнітэту Беларусі і Расіі. У прыярытэце таксама біятэхналогіі ў медыцыне і сельскай гаспадарцы, гэта значыць як захаванне здароўя чалавека, так і забеспячэнне харчовай бяспекі.

Дзяржаўны сакратар Саюзнай дзяржавы Сяргей Глазьеў адзначыў, што пасяджэнне прысвечана маніторынгу рэалізацыі навукова-тэхнічных праграм СД. «У Саюзнай дзяржаве рэалізуецца стратэгія навукова-тэхналагічнага супрацоўніцтва, праграмы - частка гэтай работы. НАН Беларусі — наш партнёр у гэтай рабоце, мы заўсёды абапіраемся на экспертнае меркаванне беларускіх калег», — падкрэсліў ён.

 

У парадку дня мерапрыемства шэраг пытанняў, у тым ліку падвядзенне вынікаў выканання праграм, мерапрыемстваў, асваення бюджэтных сродкаў Саюзнай дзяржавы ў 2025 годзе і разгляд ходу падрыхтоўкі пытанняў, якія плануюцца да ўнясення ў Савет Міністраў Саюзнай дзяржавы ў 2026 годзе. У нарадзе ўдзельнічалі прадстаўнікі міністэрстваў і ведамстваў Беларусі — дзяржаўных заказчыкаў праграм і мерапрыемстваў Саюзнай дзяржавы.