Вучоныя з Масачусецкага тэхналагічнага інстытута пратэсціравалі тэхналогію, здольную забяспечваць вадой нават у самых засушлівых месцах Зямлі. Гэта новы тып панэлі, якая збірае вільгаць з паветра і ператварае яе ў прыдатную для піцця ваду — і ўсё гэта без падлучэння да электрасеткі. Даследаванне апублікавана ў часопісе Nature Water.
У аснове распрацоўкі — гідрагель, які знаходзіцца паміж двума пластамі шкла. Уначы прылада паглынае вадзяную пару, а днём дзякуючы адмысловаму пакрыццю шкло застаецца халаднаватым, і вільгаць кандэнсуецца, сцякаючы ў сістэму збору вады. Гідрагель пры гэтым сфарміраваны ў структуру, якая нагадвае пузырчатую плёнку: купалападобныя сегменты павялічваюць плошчу паверхні і дазваляюць утрымліваць больш вільгаці.
Новую тэхналогію выпрабавалі ў Даліне Смерці, самым гарачым і сухім месцы Паўночнай Амерыкі. Нягледзячы на экстрэмальныя ўмовы, прылада штодня вырабляла ад 57 да 161 мл вады. У больш вільготных рэгіёнах гэты паказчык можа быць значна вышэйшым.
Галоўнае адрозненне новай сістэмы ад папярэдніх мадэляў — бяспека атрыманай вады. У звычайных гідрагелях солі літыя, якія паляпшаюць убіральнасць, маглі прасочвацца ў ваду. У гэтай канструкцыі дададзены гліцэрын, які зніжае ўзровень забруджвання да бяспечнага.
Па разліках даследчыкаў, восем панэляў памерам 1×2 метра могуць забяспечыць вадой домагаспадарку ў аддаленым раёне. Панэлі кампактныя, вертыкальна размяшчаюцца і не патрабуюць электрычнасці. Чакаецца, што кошт прылады акупіцца менш за месяц у параўнанні з выдаткамі на бутыляваную ваду.
Фота з адкрытых крыніц«Цяпер людзі могуць аб’ядноўваць панэлі ў масівы і забяспечваць рэальны доступ да пітной вады», — адзначыў адзін з аўтараў даследавання, прафесар Сюаньхэ Чжао.
