На сценах разбуранага Чарнобыльскага рэактара выяўлены ўнікальны арганізм — грыб Cladosporium sphaerospermum. Ён не проста выжывае ва ўмовах смяротнай радыяцыі, а выкарыстоўвае яе для росту, паведаміла агентства «Мінск-Навіны» са спасылкай на выданне ScienceAlert.
Даследаванні паказалі, што пад дзеяннем іанізуючага выпраменьвання калоніі гэтага чорнага грыба развіваліся больш актыўна, што супярэчыць тыповай рэакцыі жывых клетак на радыяцыю.
Навукоўцы звязваюць гэту незвычайную здольнасць з цёмным пігментам — меланінам, які ў вялікай колькасці ўтрымлівае грыб. Паводле гіпотэзы, меланін дазваляе пераўтвараць энергію радыяцыі ў хімічную, аналагічна таму, як хларафіл у раслін улоўлівае сонечнае святло для фотасінтэзу. Гэты працэс атрымаў назву радыесінтэз.
Нягледзячы на пацверджаны факт паскоранага росту ў радыеактыўным асяроддзі, дакладныя біяхімічныя механізмы радыесінтэзу пакуль застаюцца загадкай для навукі.
