Любы СМІ ў Беларусі і Расіі, які адстойвае інтарэсы сваёй Радзімы, на Захадзе лічыцца ворагам. Так генеральны дырэктар інфармацыйнага агенцтва Расіі ТАСС Андрэй Кандрашоў пракаментаваў блакіраванне амерыканскім відэахостынгам YouTube каналаў БелТА, а таксама АНТ і СТБ. Пра гэта паведаміла БелТА.
«Вы папоўнілі вельмі добрую кампанію сумленных і верыфікаваных журналістаў — тых, якія выступаюць за факты і праўду, а не за тое, каб танцаваць пад дудку вашынгтонскіх лялькаводаў», — сказаў Андрэй Кандрашоў БелТА.
Ён канстатаваў, што ілюзіі 90-х гадоў мінулага стагоддзя адносна справядлівасці, аб’ектыўнасці і праўды, якую нам нясуць «светлыя» еўрапейскія і амерыканскія сродкі масавай інфармацыі, павінны былі ўжо даўным-даўно развеяцца. «Мы павінны разумець, што з намі паводзяць сябе як з тэрыторыяй праціўніка», — падкрэсліў генеральны дырэктар ТАСС.
Пры гэтым ён звярнуў увагу, што паводле ўнутраных правіл цэлага шэрагу заходніх сацсетак і буйных інтэрнэт-платформаў любыя СМІ, звязаныя з дзяржавай, апрыёры не лічацца аб’ектыўнымі. «Яны апрыёры не вераць нам, калі мы маем дачыненне да дзяржавы. Гэта значыць, калі ты ў сваёй інфармацыі так ці інакш улічваеш інтарэсы Радзімы, то выступаеш супраць іх дзяржавы. Таму з гэтага пункту гледжання мы ўсе ўжо даўным-даўно павінны былі быць закрыты. І я, шчыра кажучы, здзіўлены, чаму вас гэтая доля напаткала толькі цяпер, бо ў нас гэтыя праблемы пачаліся яшчэ восем гадоў таму», — адзначыў Андрэй Кандрашоў.
«Усё, што магу пажадаць сваім калегам, — гэта заставацца сумленнымі, праўдзівымі, верыфікаваць гэтак жа, як і раней, любы факт, які вы выдаяце ў вялікую публічную прастору. І самая галоўная мая парада — працягваць любіць Радзіму. Таму што гэта куды важней, чым месца пад сонцам якога-небудзь YouTube», — дадаў ён.
Гаворачы пра тое, што на відэахостынгу пасля блакіравання канала БелТА адразу ж сталі з’яўляцца фальшывыя клоны, генеральны дырэктар ТАСС канстатаваў, што гэта адпрацаваная тэхналогія. «Самае каштоўнае, што ёсць на вялікіх платформах, — гэта твая аўдыторыя. Калі нейкі буйны СМІ блакуецца, аўдыторыя застаецца. Выдатная магчымасць для тых, хто хоча зарабіць грошы і пакінуць у сябе гэтую аўдыторыю, — імгненна стварыць клон. Гэта могуць быць як звычайныя фінансавыя махляры, так і палітычна ангажаваныя асобы, якія жадаюць маніпуляваць аўдыторыяй БелТА», — папярэдзіў Андрэй Кандрашоў.
