Сітуацыя ў горадзе знаходзіцца на пастаянным кантролі, аператыўна прымаюцца ўсе неабходныя рашэнні. Як адзначыў начальнік Магілёўскага гарадскога аддзела па НС Вячаслаў Башарымаў, падчас другога пасяджэння штаба падводзілі прамежкавыя вынікі, вызначалі, якія задачы выкананы, а на якія трэба звярнуць увагу.

«За мінулыя суткі выпала больш за 24 мм ападкаў. Снегапад працягнецца, арыенціровачна, да 15.00. Аварыйныя службы працягваюць працаваць ва ўзмоцненым варыянце нясення службы. Магілёўскі гарадскі аддзел НС узняты па трывозе, у тым ліку для расчысткі сацыяльных аб’ектаў, дзіцячых, дашкольных устаноў, прыпыначных пунктаў і аказання дапамогі», — адзначыў ён.

За мінулую ноч у горадзе было 19 паведамленняў па лініі МНС, з іх 4 на зняцце незамацаваных канструкцый, два — на аказанне дапамогі сацыяльна ўразлівай катэгорыі грамадзян. «У адным выпадку не працаваў ацяпляльны кацёл, там былі прынятыя меры, у другім выпадку ў чалавека з інваліднасцю засыпала ўваходныя дзверы, праведзена ачыстка ўваходных груп. Таксама ажыццяўлялася буксіроўка машын хуткай медыцынскай дапамогі. Усе неабходныя брыгады працуюць ва ўзмоцненым варыянце нясення службы, жыццезабеспячэнне Магілёва не парушана. Аварый і інцыдэнтаў не адбылося», — расказаў Вячаслаў Башарымаў.

Начальнік гарадскога аддзела па НС адзначыў, што жыхары горада з разуменнем ставяцца да сітуацыі. «Хтосьці раней выйшаў на працу, хтосьці выйшаў чысціць свой аўтамабіль для таго, каб своечасова дабрацца на працу. Хтосьці скарыстаўся па рэкамендацыі супрацоўнікаў ДАІ грамадскім транспартам. Вось у гэтым разуменні і ёсць наша агульная барацьба са стыхіяй», — рэзюмаваў ён.

Па словах галоўнага ўрача Магілёўскай цэнтральнай паліклінікі Віктара Аляксейкава, усе амбулаторна-паліклінічныя ўстановы горада і раёна працуюць у штатным рэжыме, а дапамогу насельніцтву аказваюць у поўным аб’ёме. «У начны час былі абслужаны ўсе выклікі, у 6 выпадках узніклі праблемы з пад’ездам, у тым ліку ў двух выпадках прыцягваліся службы МНС. У выніку ўсе пацыенты наведаны, усім аказана неабходная дапамога. Той, хто мае патрэбу, дастаўлены ў стацыянарныя ўстановы, — адзначыў ён. — Сістэма аховы здароўя горада спрацавала ў поўным аб’ёме. І зараз мы гатовыя аказваць медыцынскую дапамогу ва ўсіх паліклініках і стацыянарных установах. Працуем у звязку з усімі камунальнымі службамі, ажыццяўляецца аператыўнае ўзаемадзеянне».

Ён таксама дадаў, што пад’язныя шляхі і дарогі расчышчаюцца камунальнымі службамі. Непасрэдна пешаходныя дарожкі і прымыкаючыя тэрыторыі да ўстаноў аховы здароўя, у тым ліку ў сельскай мясцовасці, прыбіраюцца сіламі ўстаноў аховы здароўя. Людзі выходзяць, дапамагаюць — усюды доступ забяспечаны.

Гарадскі электрычны транспарт горада таксама функцыянуе ў поўным аб’ёме. «Для нармальнай работы гарадскога электрычнага транспарту важныя два складнікі: паветраныя кантактна-кабельныя сеткі, якія ў дадзены момант знаходзяцца ў тэхнічна спраўным стане, і вулічна-дарожная сетка. Па выпуску рухомага саставу ў непагадзь мы спрацавалі ў штатным рэжыме — не было ніякіх затрымак і перашкод для нармальнага выпуску транспарту ў планавым аб’ёме. Мы выпусцілі 72 машыны, запланаваныя ў працоўныя дні. Вядома, былі невялікія затрымкі ў руху па некаторых маршрутах, аднак камунальныя службы хутка справіліся з сітуацыяй на дарогах», — расказаў дырэктар Магілёўскага філіяла «Тралейбусны парк № 1» ААТ «Магілёўаблаўтатранс» Сяргей Манастырэнка.

Начальнік Магілёўскага гарадскога раёна электрычных сетак Уладзімір Манкевіч расказаў, што ў вячэрні і начны час былі арганізаваныя ўзмоцненыя дзяжурствы брыгад. Сістэма электразабеспячэння спрацавала ўстойліва, былі адзінкавыя заяўкі, масавых адключэнняў не было. «Працягваем працаваць ва ўзмоцненым рэжыме: восем брыгад дзяжураць, тэхніка напагатове. Калі будуць паступаць заяўкі, адрэагуем аператыўна», — сказаў ён.


Работы па ліквідацыі наступстваў снегападу ў горадзе працягваюцца.