У БТПР нагадалі, што агульная працягласць вясновага палявання не можа перавышаць 28 дзён (за выключэннем палявання на самцоў слонкі). Канкрэтныя тэрміны адкрыцця і закрыцця сезона кожная паляўнічая гаспадарка мае права ўстанаўліваць самастойна — у залежнасці ад наяўнасці аб’ектаў палявання ва ўгоддзях.

Дазволена здабыча асобін любога полу і ўзросту гусі белалобай, гусі-гуменніка, гусі шэрай і казаркі канадскай, баклана, голуба шызага, чаплі шэрай, чаплі белай вялікай. У той час як з ліку крыжанкі, качкі-свіязі, гогаля, шыраканоскі, чэрнеці чубатай, чырка-свістунка, чырка-траскунка і качкі шэрай — здабычы падлягаюць толькі качары.

Здабыча гусей і качак ажыццяўляецца ў светлы час сутак, за выключэннем прамежку з 12 да 18 гадзін, ружэйным спосабам са скрадка альбо з засады з выкарыстаннем маскіровачнага халата і падманьваннем з дапамогай манка або падсаднога гусака (ці гусей), качкі (ці качак), а таксама профіляў альбо пудзілаў гусі. Выкарыстоўваецца гладкаствольная паляўнічая зброя з ужываннем патронаў, начыненых шротам. Для пошуку і падачы здабытай дзічыны могуць выкарыстоўвацца тэр’еры, таксы, лягавыя, спаніэлі, рэтрыверы, водныя сабакі.

У працэсе вясновага палявання дапускаецца здабыча толькі тых відаў птушак, якія ўказаны ў паляўнічай пуцёўцы. Здабыча птушак іншых відаў, а таксама самак качак і слонкі не дапускаецца і лічыцца незаконным паляваннем, што цягне за сабой адміністрацыйную або крымінальную адказнасць.

У мэтах найбольш поўнага задавальнення патрэбнасцяў членаў РДГА «БТПР» у паляванні загадам арганізацыі ўстаноўлены мінімальная і максімальная межы кошту паляўнічых пуцёвак на ненармуемыя віды паляўнічых жывёл на вясновы сезон 2026 года.