Пытанне знаходзіцца на асабістым кантролі кіраўніка дзяржавы. Капыльскі раён — адзін з лепшых у краіне па арганізацыі такой работы.

Удзельнікі выязнога пасяджэння наведалі магазін «Родны кут» у аграгарадку Мажа. Тут нядаўна поўнасцю замянілі гандлёвае і халадзільнае абсталяванне, забяспечылі камфортныя ўмовы для пакупнікоў і прадаўцоў. У продажы — кандытарскія, кулінарныя, каўбасныя, хлебабулачныя вырабы мясцовага райспажыўтаварыства, свежыя малочныя і мясныя прадукты, агародніна, фрукты, у тым ліку закупляемыя ў насельніцтва. Устанавілі кавамашыну.

Актыўна працуюць нарыхтоўшчыкі Белкаапсаюза. Самы хадавы тавар — яблыкі. Вяскоўцы самі прывозяць іх мяшкамі на нарыхтоўчыя пункты. Акрамя таго, ураджай могуць забраць адразу з участка. Сёння апад прымаюць па 16 капеек за кілаграм, яблык таварны — па 1 рублю 20 капеек.

Удзельнікам выязнога пасяджэння расказалі аб парадку фарміравання закупачных цэн, умовах захоўвання. Наталля Качанава таксама пагутарыла з пакупнікамі і калектывам магазіна, падкрэсліла, што такія гандлёвыя аб’екты і сэрвіс у вёсцы неабходна развіваць. Важна забяспечыць даступнасць нарыхтоўчых пунктаў, каб людзі маглі зручна і выгадна рэалізоўваць лішкі ўраджаю са сваіх падворкаў.

Мясцовыя жыхары змаглі задаць пытанні. Адно з іх датычылася магчымасці ўладкавання ў аграгарадку пляцоўкі, дзе было б цікава праводзіць час падлеткам. Праект хочуць прадставіць на конкурс грамадзянскіх ініцыятыў. Як адзначыла Наталля Качанава, у Мінскай вобласці павялічана фінансаванне на гэтыя мэты. Для рэгіёнаў гэта добрая магчымасць ажыццявіць свае ідэі.

«Мы ўзялі за практыку праводзіць выязныя прэзідыумы, каб вывучаць рэальную сітуацыю на месцах і адкрыта размаўляць з людзьмі. Механізм падтрымкі грамадзянскіх ініцыятыў нарадзіўся менавіта з прапаноў мясцовых дэпутатаў і атрымаў падтрымку кіраўніка дзяржавы», — адзначыла Наталля Качанава.

Наступны пункт праграмы — квасільна-засолачны ўчастак у аграгарадку Цімкавічы, дзе прэзентавалі хіты продажаў і навінкі вытворчасці. Прыклад гэтага ўчастка паказвае, як дзякуючы правільнаму кіраванню можна атрымаць выдатны вынік. Адносна невялікія інвестыцыі далі магчымасць абсталяваць комплекс сучаснай камерай захоўвання, стварыць дастойныя ўмовы працы.

У самім Капылі ўдзельнікі пасяджэння пабывалі ў магазіне «Журавінка», дзе ацанілі, як наладжана абслугоўванне пакупнікоў і як прадстаўлены айчынныя вытворцы.

Падрабязна пытанні закупкі сельгаспрадукцыі ў насельніцтва і яе перапрацоўкі абмеркавалі на пасяджэнні. Падводзячы вынік сустрэчы ў размове з журналістамі, старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Леанід Заяц адзначыў, што тэма вельмі важная. «У краіне налічваецца каля 1 млн асабістых падсобных гаспадарак, у распараджэнні якіх знаходзіцца 227 тыс. га зямлі. Чакаецца, што ў гэтым годзе насельніцтва атрымае больш за 350 тыс. т яблыкаў і груш. Задача на месцах — забяспечыць закупку лішкаў прадукцыі і прапанаваць перапрацоўчым прадпрыемствам», — адзначыў Леанід Заяц.

За 7 месяцаў бягучага года «Белкаапсаюз» ужо нарыхтаваў каля 8 тыс. т яблыкаў, з якіх 7 тыс. т закупіў у насельніцтва. Працуюць 794 нарыхтоўчыя пункты, 120 мабільных нарыхтоўчых экіпажаў, якія ахопліваюць каля 23 тыс. населеных пунктаў.

«Заслухалі даклады кіраўнікоў Белкаапсаюза, Белдзяржхарчпрама, прадпрыемстваў, якія нарыхтоўваюць прадукцыю. Бачым, што праведзена вялікая работа. Насельніцтва праінфармавана аб парадку і месцах нарыхтоўкі. Узяты на кантроль просьбы людзей», — дадаў Леанід Заяц.

Частку прадукцыі перапрацоўваюць арганізацыі спажывецкай кааперацыі (у структуры — 15 квасільна-засолачных цэхаў), частка адпраўляецца вытворцам, у гандлёвыя сеткі. «Прыклад Капыльскага раёна павінен стаць арыенцірам для ўсёй рэспублікі. Нам важна заставацца ў пастаянным дыялогу з людзьмі, рэагаваць на любыя запыты. Продаж лішкаў з асабістых падворкаў для вяскоўцаў — магчымасць атрымаць гарантаваны даход», — расказаў Леанід Заяц.

Чарговае выязное пасяджэнне прэзідыума Савета Рэспублікі запланавана правесці на Гарадзейскім цукровым камбінаце. Яго тэмай стануць пытанні здаровага харчавання.

У гэты дзень у Дзяржынскім раёне Наталля Качанава таксама ўручыла падарункі трактарысту-машыністу ААТ «Крутагор’е-Петкавічы» Любові Неўмяржыцкай за паспяховую работу ў час уборачнай кампаніі.