Флагман і першынец нафтаперапрацоўчай прамысловасці Беларусі паспяхова працуе 62 гады. Прадпрыемства мае паліўна-маслена-араматычны профіль. Тут выпрацоўваюць нафтапрадукты, якія прымяняюцца ў розных галінах народнай гаспадаркі, а таксама рэалізуюцца на экспарт.

ААТ «Нафтан» завяршыла рэалізацыю самай маштабнай у сваёй гісторыі праграмы інвестыцыйнага развіцця — уведзены ў эксплуатацыю комплекс запаволенага каксавання (КЗК). Гэты праект стаў шмат у чым новым і ўнікальным досведам не толькі для завода, але і для Беларусі. Яго мэта — атрыманне светлых нафтапрадуктаў: вуглевадароднага і звадкаванага газу, бензіну, цяжкага і лёгкага газойлю, нафтавага коксу. КЗК — дакладнае трапленне ў галоўныя мэты «Нафтана», за кошт яго ўводу глыбіня перапрацоўкі нафты дасягнула 92 %. На КЗК прадпрыемства таксама атрымала новую прадукцыю — серу (вадкую, грануляваную) і нафтавы кокс. Галіна выкарыстання нафтавага коксу вызначаецца якаснымі характарыстыкамі — цеплынёй згарання, утрыманнем серы, лятучых рэчываў, попелу і вільгаці. Нафтавы кокс пастаўляецца на экспарт.

Акрамя таго, рэалізацыя інвестыцыйнага праекта «Будаўніцтва комплексу запаволенага каксавання» дазволіла стварыць больш як 400 новых працоўных месцаў у ААТ «Нафтан».

Прэм’ер-міністр азнаёміўся з работай устаноўкі АТ-8, дзе ажыццяўляецца першасная перапрацоўка нафты. Аляксандра Турчына праінфармавалі аб яе тэхнічным стане і прадукцыйнасці — да 7,2 млн т нафты ў год. Адна з найважнейшых задач АТ-8 — атрыманне шырокага асартыменту якасных прадуктаў для забеспячэння сыравінай усяго прадпрыемства.

Аляксандр Турчын таксама правёў рабочую сустрэчу на «Нафтане». Адной з ключавых тэм з’яўляўся разгляд вынікаў работы нафтаперапрацоўчай галіны Беларусі за 2025 год, прагноз на 2026-ы і пяцігодку.