«Сапраўды, вышэйшы судовы орган становіцца найважнейшай крыніцай аналітычнага складніка па выніках разгляду спраў у судах, выяўлення магчымых нестыковак, дзесьці — недасканаласці, недапрацовак закона. Мы будзем удзячныя, калі будзем выходзіць на нейкія заканадаўчыя ініцыятывы, не ламаючы ў цэлым сістэму, якая ўстаялася», — сказаў Ігар Сергяенка.

Паводле яго слоў, заканатворчасць з’яўляецца ключавым кірункам, па якім вядзецца сумесная работа. Гаворка ідзе аб узаемадзеянні на стадыях распрацоўкі законапраектаў, абмеркавання на пляцоўцы Палаты прадстаўнікоў пасля іх унясення ў парламент.

Старшыня Палаты прадстаўнікоў праінфармаваў, што пры цесным узаемадзеянні за апошнія гады прыняты шэраг знакавых для судовай сістэмы заканадаўчых актаў. У прыватнасці, гэта закон аб змяненні кодэксаў па пытаннях судовага ладу і статусу суддзяў, Кодэкс грамадзянскага судаводства.

У бягучым скліканні прыняты законы аб комплексным змяненні заканадаўства па пытаннях крымінальнай адказнасці, па пытаннях адміністрацыйнай адказнасці, па пытаннях рэгулявання грамадзянскага судаводства і грамадзянскіх праваадносін, якім шэраг законаў прыведзены ў адпаведнасць з Кодэксам грамадзянскага судаводства.

У красавіку гэтага года Палатай прадстаўнікоў разгледжана прапанова Вярхоўнага Суда аб карэкціроўцы арт. 313 Кодэкса грамадзянскага судаводства (аб індэксацыі грашовых сум, прысуджаных судом на карысць юрыдычных асоб). Яна ўключана ў законапраект па пытаннях прафілактыкі правапарушэнняў, прыняты на мінулым тыдні ў другім чытанні.

З удзелам кіраўніцтва Вярхоўнага Суда абмяркоўваліся падыходы і былі выпрацаваны з улікам выказанай пазіцыі канкрэтныя нарматыўныя прадпісанні па праекце закона па пытаннях прававой аховы аб’ектаў інтэлектуальнай уласнасці. На мінулым тыдні законапраект быў прыняты ў другім чытанні.

Зараз профільнай камісіяй прапрацоўваюцца прапановы аб зменах у Кодэкс аб шлюбе і сям’і. Выказаная пазіцыя — рэзультат аналізу практыкі прымянення судамі агульнай юрысдыкцыі заканадаўства ў гэтай сферы, па выніках якога выяўлена неабходнасць карэкціроўкі.

Старшыня Палаты прадстаўнікоў падкрэсліў, што работа павінна ісці ад жыцця, адпавядаць запытам нацыянальнай эканомікі, нацыянальнай бяспекі, патрабаванням сучаснасці і ўлічваць меркаванне спецыялістаў і правапрымяняльнікаў, на што нацэльвае кіраўнік дзяржавы.

«Таму мы ўдзяляем самую сур’ёзную ўвагу маніторынгу правапрымяняльнай практыкі», — сказаў Ігар Сергяенка. Ён адзначыў, што для гэтага выкарыстоўваюцца розныя фарматы, у тым ліку практыка-арыентаваныя семінары, выязныя пасяджэнні Савета Палаты прадстаўнікоў па пытаннях, якія папярэднічаюць разгляду ў другім чытанні тых ці іншых законапраектаў. Такіх мерапрыемстваў у перыяд трэцяй сесіі было праведзена каля 40. Вынікі пасяджэнняў знаходзяць увасабленне ў канкрэтных рашэннях і карэкціроўцы тых ці іншых нормаў пры разглядзе законапраектаў на пляцоўцы Палаты прадстаўнікоў.