Карціну ў Віцебск прывезлі з Траццякоўскай галерэі. Пад твор майстра ў Мастацкім музеі абсталявалі асобную залу. 

Вяртанне знакамітага палатна на радзіму мастака стала сапраўды гістарычнай падзеяй. Жыхары і госці горада зараз змогуць убачыць працу, напісаную ў 1914–1918 гадах, якая ўвасабляе ўнікальны свет майстра, дзе рэальнасць сплятаецца з марай і паэзіяй. Карціна з’яўляецца гімнам кахання Шагала да яго жонкі Бэлы. Закаханыя, якія лунаюць над Віцебскам, сімвалізуюць сілу пачуццяў, што пераадолелі зямное прыцягненне. Асабліва каштоўная ў творы — дэталёвая выява гістарычнага Віцебска пачатку XX стагоддзя. На палатне можна пазнаць палац губернатара, абрысы страчанай Спаса-Праабражэнскай царквы, дом з чырвонай цэглы, дзе зараз размешчаны Арт-цэнтр Шагала. Дзякуючы пэндзлю майстра захаваўся вобраз горада, якога ўжо не існуе. Тэма палёту, упершыню ярка ўвасобленая тут, у далейшым стала ключавым сімвалам свабоды і духоўнай незалежнасці ў творчасці мастака.

Экспазіцыю дапаўняе «Партрэт Марка Шагала», напісаны ў 1914 годзе яго настаўнікам Юрыем Пэнам. Палатно дадзена Нацыянальным мастацкім музеем Беларусі. Гэта суседства дазваляе глыбей зразумець вытокі творчасці Марка Шагала.