Экспазіцыя, якая будзе працаваць да 5 лістапада, уключае 16 узораў самабытнай рукапіснай кніжнай традыцыі беларускіх татар. «Самую каштоўную частку кніжнай культуры Беларусі складаюць арабаграфічныя рукапісы, якія ствараліся татарамі на беларускіх землях на працягу стагоддзяў. Усяго ў свеце захавалася невялікая колькасць такіх рукапісных помнікаў. Калекцыя Нацыянальнай бібліятэкі Беларусі — адна з самых вялікіх. Рукапісныя кнігі беларускіх татараў аформлены арабскімі літарамі на арабскай, беларускай, польскай мовах і на цюркі. Мусульманскае навельніцтва Беларусі першае з іншых канфесійных груп стварыла на аснове арабскага пісьма арыгінальны алфавіт для запісу гукаў беларускай мовы», — адзначылі ў бібліятэцы.

Сярод экспанатаў, якія прадставяць на выставе, — свяшчэнная кніга мусульман Каран (экзэмпляры першай чвэрці XIX — пачатку XX стагоддзя з захаванымі імёнамі перапісчыкаў і ўладальнікаў), тлумачальныя каментарыі да Карана (тафсіры канца XVIII — пачатку XX стагоддзя), а таксама разнастайнага зместу зборнікі (кітабы другой палавіны XIX — пачатку ХХ стагоддзя з пазначэннем месцаў стварэння і імёнаў перапісчыкаў). Асобны раздзел дэманструе ўзоры самых распаўсюджаных кніг татараў: маленькіх малітоўнікаў — хамаілаў канца XIX — пачатку XX стагоддзя, створаных у Слоніме, Мінску і іншых рэгіёнах Беларусі.

Паралельна з выставай на працягу месяца будзе праходзіць стажыроўка для спецыялістаў аддзела рэстаўрацыі і кансервацыі бібліятэчных дакументаў Нацыянальнай бібліятэкі Беларусі. Арганізатарамі навучання выступаюць Нацыянальны музей Султаната Аман і Нацыянальнае ўпраўленне дакументацыі і архіваў Султаната Аман. Спецыялісты асвояць сучасныя метады ручной рэстаўрацыі каштоўных старых дакументаў сярэдзіны XIX — пачатку XX стагоддзя, вывучаць новыя тэхналогіі рэстаўрацыі пераплётаў і работу з сучасным рэстаўрацыйным абсталяваннем. Гэты вопыт дасць магчымасць беларускім спецыялістам укараніць перадавыя міжнародныя практыкі ў работу з унікальнымі кніжнымі помнікамі.

Урачыстае адкрыццё выставы пройдзе пад патранатам міністра па справах рэлігіі і вакфаў Султаната Аман доктара Мухамада бін Саіда аль-Мамары. У час мерапрыемства адбудзецца навуковая прэзентацыя, прысвечаная гістарычнаму кантэксту фарміравання кніжнай культуры беларускіх татараў, асаблівасцям прадстаўленых манускрыптаў і сучасным формам папулярызацыі гэтай унікальнай спадчыны.

У бібліятэцы падкрэслілі, што выстава — важны этап у развіцці культурнага супрацоўніцтва паміж Беларуссю і Аманам. Беларускія татары, з’яўляючыся прадстаўнікамі мусульманскай культуры, на працягу стагоддзяў гарманічна ўбудоўваліся ў беларускі сацыяльна-палітычны і бытавы ўклад, падзялялі з мясцовым насельніцтвам усе радасці і нягоды, захаваўшы пры гэтым свае традыцыі, рэлігію і самабытнасць. Іх кніжная спадчына — жывое сведчанне гэтага ўнікальнага сінтэзу.