Экспазіцыя разгарнулася ў выставачнай зале «Музей вайны — тэрыторыя міру». Наведвальнікі могуць убачыць каля 140 прадметаў з фондаў мемарыяльнага комплексу. У прыватнасці, прадстаўлена 60 алоўкавых і акварэльных малюнкаў мастака Віталя Фадзеева. Ён служыў у гарнізоне Брэсцкай крэпасці і захаваў на паперы сваіх таварышаў па службе, воінаў розных нацыянальнасцяў. Аўтар паказаў штодзённае жыццё гарнізона, адлюстраваў асобы камандзіраў і радавых, іх трохі стомленыя і натуральныя фігуры. Для большасці вайскоўцаў гэта былі апошнія мірныя дні. Многія з тых, каго мастак паказаў у сваіх малюнках, прынялі на сябе першыя ўдары нямецка-фашысцкіх войскаў у чэрвені 1941 года.



«Віталь Фадзееў не ўдзельнічаў у абароне крэпасці. Ён быў дэмабілізаваны да пачатку Вялікай Айчыннай вайны. Замалёўкі ён рабіў у 1939, 1940 і пачатку 1941 гадоў. Гэта ўсе асобы тых, хто служыў тут. Мы не ўсіх ведаем. Можам бачыць замалёўкі побыту салдат: хтосьці падшывае каўнерыкі, стаіць на пасадзе, дзяжурыць, адпачывае. Мастак успамінаў, што не мог доўга замалёўваць, ва ўмовах службы ён усё рабіў вельмі хутка. У фондах у нас захоўваюцца каля 300 яго работ», — расказалі ў мемарыяльным комплексе.



На выставе прадстаўлены таксама даваенныя фатаграфіі вайскоўцаў Брэсцкага гарнізона. Іх лёсы склаліся па-рознаму: хтосьці дайшоў да Берліна, іншыя загінулі ў першыя дні вайны. «На малюнках і здымках тыя, у каго магло быць наперадзе ўсё жыццё. У кожнага былі мары, планы на будучыню. Але ўсё змяніла вайна. Менавіта яны ў чэрвені 1941 года сталі першымі абаронцамі Радзімы», — адзначылі ў мемарыяльным комплексе. У экспазіцыі можна ўбачыць здымкі ацалелых абаронцаў і членаў іх сем’яў на сустрэчах пасля заканчэння вайны.



Выставу «Яны былі першымі...» можна наведаць да 10 жніўня.