У Беларусі стартаваў першы модуль рэпетыцыйнага тэсціравання. Аліна Каразей — сярод першых яго ўдзельнікаў. Дзяўчына здае грамадазнаўства, бо гэты прадмет спатрэбіцца ёй для паступлення. «Я ўпершыню ўдзельнічаю ў РТ. З гэтага года пачала рыхтавацца да будучага паступлення на эканамічны факультэт БДУ. Я ўважліва слухаю настаўнікаў на ўроках, якасна выконваю дамашнія заданні, займаюся самападрыхтоўкай. На РТ прыйшла ў першую чаргу паглядзець, як выглядаюць самі заданні. Таксама важна навучыцца запаўняць бланкі, каб потым на самім іспыце не губляць час і нервы на гэтым моманце. Разлічваю, што мой першы вынік будзе больш за 70 балаў, мэта — 100 балаў на ЦЭ і ЦТ. Рэпетыцыйнае тэсціраванне — прамы шлях да гэтага», — расказала Аліна. 

Яе аднакласніца Аліса Хейдарава выбірае паміж факультэтам міжнародных адносін і эканамічным факультэтам БДУ. Абодва варыянты патрабуюць выключнай падрыхтоўкі, таму дзяўчына вырашыла праверыць свае сілы на РТ. «Для мяне важна не хвалявацца ў адказны момант. Як гэта зрабіць? З дапамогай РТ я адтачу да дасканаласці запаўненне бланка, убачу структуру заданняў, абвыкну да атмасферы. Я магу з-за хвалявання нешта пераблытаць, напісаць няправільна. Гэта знізіць выніковыя балы на іспыце. Каб такога не здарылася, я прыйшла на рэпетыцыйнае тэсціраванне. Мая канчатковая мэта — 100 балаў за прадмет. Спадзяюся, што ўсё атрымаецца дзякуючы ў тым ліку такім рэпетыцыям», — падзялілася дзесяцікласніца. 

Выкладчык фізікі Ліцэя імя Ф.Э.Дзяржынскага БДУ Мацвей Валдоўскі сёлета скончыў Белдзяржуніверсітэт і працуе па размеркаванні. Але ён таксама ў ліку тых, хто здае РТ. «Мне гэта трэба ў тым ліку для таго, каб даказаць самому сабе, што я магу здаць іспыты, а планую прайсці выпрабаванні па фізіцы, матэматыцы і рускай мове. Таксама хачу паказаць дзецям, што яны навучаюцца ў педагогаў, якія ведаюць свой прадмет. Ну і ў рэшце рэшт імкнуся зрабіць больш карэктны акцэнт на актуальных ведах, неабходных для здачы ЦТ. Усё гэта дазволіць мне скарэктаваць свой план падрыхтоўкі старшакласнікаў, абапіраючыся на атрыманы тут досвед. Разлічваю атрымаць запаветныя 100 балаў», — расказаў малады педагог.

Намеснік дырэктара па вучэбнай рабоце Аляксандр Пугач праінфармаваў, што ў першы дзень старту першага модуля РТ у ліцэі іспыты пішуць каля 180 чалавек. «Мы праводзім тэсціраванне па ўсіх прадметах. У буднія дні мы прымаем да 200 чалавек на рэпетыцыйнае тэсціраванне. Па выхадных днях гэтая лічба ў разы павялічваецца: да нас прыходзяць і 500, і 600 чалавек за дзень», — адзначыў ён.

Паводле слоў намесніка дырэктара ўстановы адукацыі, сярод самых папулярных прадметаў — руская мова, матэматыка, англійская. «Самае галоўнае, што дзеці выносяць пасля праходжання рэпетыцыйнага тэсціравання — знаёмства з самой формай правядзення такога віду іспыту. Яны бачаць бланк, які трэба запаўняць, яны бачаць фармулёўкі і структуру заданняў, якія ім прапануюць на цэнтралізаваным іспыце або на цэнтралізаваным тэсціраванні. І ўжо пасля гэтага яны паспрабуюць свае сілы. У хлопцаў і дзяўчат зараз ёсць магчымасць памыліцца, і гэтая памылка не будзе крытычнай. Яны навучацца і на самім экзамене ўжо буду думаць не аб тым, як тэхнічна ўсё зрабіць правільна, а будуць разважаць непасрэдна над умовамі заданняў», — рэзюмаваў Аляксандр Пугач.

Першы модуль РТ пройдзе па 24 снежня, другі — з 4 студзеня па 21 лютага, трэці — з 1 сакавіка па 30 красавіка. Тыя ўдзельнікі, якія не змогуць прайсці іспыты вочна, атрымаюць магчымасць выканаць тэст дыстанцыйна ў анлайн-рэжыме пасля заканчэння модуля.