Адзначаецца, што часта гэта адбываецца з-за грэбавання элементарнымі мерамі бяспекі і няправільнай ацэнкі ўласных сіл на незнаёмай мясцовасці. МНС нагадвае: збіраючыся ў лес, памятайце аб бяспецы.

— Перад выхадам вывучыце маршрут і мясцовасць, паглядзіце карту, — рэкамендуюць у МНС. — У самым лесе заўсёды фіксуйце ўвагу на арыенцірах: лініях электраперадачы, прасеках, незвычайных дрэвах, рачулках або ўзгорках. Яны дапамогуць трымаць напрамак.

Ратавальнікі таксама раяць абавязкова папярэдзіць блізкіх — членаў сям’і, сяброў або суседзяў, — паведаміўшы ім, у які менавіта раён ці лясны масіў вы накіроўваецеся, і назваўшы арыенціровачны час вяртання. Калі вы не выйдзеце на сувязь своечасова, яны адразу паднімуць трывогу.

Важна ўзяць з сабой поўнасцю зараджаны тэлефон і паўэрбанк. Апранацца варта ярка: забыцца пра камуфляж і цёмныя курткі, абраць адзенне кантрасных колераў, пажадана са святлоадбівальнымі элементамі. Так ратавальнікам будзе значна лягчэй заўважыць чалавека нават у прыцемках.

У ведамстве дапоўнілі, што, нават калі вы ідзяце «ўсяго на гадзінку», абавязкова вазьміце з сабой невялікі запас пітной вады і сытны перакус, жыццёва важныя медыкаменты, якія вы прымаеце ўвесь час, а таксама запалкі ці запальнічку.