Гісторык падкрэсліў, што, паводле задумы Прэзідэнта, канцэпцыя ўстановы культуры распрацавана так, каб любы, хто пройдзе па выставачных залах, змог адчуць багацце беларускай спадчыны. «Канцэпцыю абазначыў кіраўнік дзяржавы. Ён сказаў, што ў музей павінны прыйсці турысты, маладыя людзі, прайсці па ўсіх залах і выйсці адтуль патрыётамі Беларусі, быць упэўненым у прыгажосці, унікальнасці тысячагадовай гісторыі Беларусі, — сказаў Вадзім Лакіза. — І ўсе залы Нацыянальнага гістарычнага музея будуць прасякнуты гэтай дзіўнай гісторыяй — гісторыяй гераізму, людзей, падзей».

Дырэктар Інстытута гісторыі НАН адзначыў, што ў новым музеі можна будзе даведацца, як адбывалася станаўленне нашай дзяржаўнасці. «Будуць абазначаны дагістарычны перыяд і гістарычныя формы беларускай дзяржаўнасці — Полацкае, Тураўскае княствы, перыяд Вялікага Княства Літоўскага, Расійскай імперыі. І нацыянальныя формы беларускай дзяржаўнасці — савецкі перыяд і, вядома, Рэспубліка Беларусь як вянец усяго гістарычнага развіцця, да чаго мы прыйшлі дзякуючы працы, намаганням нашых продкаў. Там будзе паказана і сучасная гісторыя, і розныя напрамкі жыццядзейнасці чалавека — космас, навука, абарона. Гэта вельмі важна, таму што такім чынам Нацыянальны гістарычны музей увасабляе ў сабе ўсе нацыянальныя дасягненні сучаснай Рэспублікі Беларусь», — растлумачыў Вадзім Лакіза.

 

Ён дадаў, што ва ўстанове культуры будуць прадстаўлены цікавыя археалагічныя знаходкі. «Там будуць абазначаны ўсе перыяды, напрыклад, палеаліт, мезаліт, бронзавы век, эпоха Сярэдневякоўя, — расказаў эксперт. — І мне яшчэ як археолагу і гісторыку вельмі важна, што мы будзем паказваць вельмі многія арыгінальныя артэфакты, у тым ліку якія выяўлены ў выніку найноўшых археалагічных даследаванняў ужо ў сучаснай Рэспубліцы Беларусь. Такім чынам, мы зноў бачым гэту сувязь і гісторыі, і сучаснасці. Гэта вельмі важна. Гэта таксама кіраўнік дзяржавы падкрэсліваў, каб музей не забываў пра традыцыі і інавацыі, гэта значыць, гэтыя традыцыі, традыцыйнае грамадства, культуру, якая дала магчымасць нам быць і называцца беларусамі. Але мы гаворым і аб тым, што гэту цеплыню старажытнасці захоўваем, выкарыстоўваем усе дасягненні сучаснасці, але і думаем пра будучае пакаленне».

Вадзім Лакіза падкрэсліў, што ў новым музеі будуць залы, прысвечаныя гісторыі Вялікай Айчыннай вайны і тэме генацыду беларускага народа. «Пра гэта нельга не гаварыць, нельга гэта пакідаць без увагі. І трэба паказаць так, каб мы дакладна разумелі: праз гэты трагізм і гераізм мы захавалі сучасны мір», — сказаў дырэктар Інстытута гісторыі НАН.