У кваліфікацыйнай групе В першае месца занялі футбалісты Швейцарыі, якія ў заключным паядынку ў гасцях згулялі ўнічыю з камандай Косава — 1:1. З такім жа вынікам шведы завяршылі дамашні матч са славенцамі. Выніковае становішча: Швейцарыя — 14 ачкоў, Косава — 11, Славенія — 4, Швецыя — 2.

Пераможцам квартэта С стала зборная Шатландыі, якая абгуляла дома датчан — 4:2. Беларускія футбалісты завяршылі адборачны турнір нічыёй з грэкамі — 0:0. Выніковае становішча: Шатландыя — 13 ачкоў, Данія — 11, Грэцыя — 7, Беларусь — 2.

У групе Е першымі фінішавалі іспанскія футбалісты, якія ў апошнім туры згулялі ўнічыю з турэцкай камандай — 2:2. Зборная Балгарыі перамагла грузінскіх футбалістаў — 2:1. Выніковае становішча: Іспанія — 16 ачкоў, Турцыя — 13, Грузія — 3, Балгарыя — 3.

У вырашальным паядынку за першае месца ў квартэце Н зборная Аўстрыі здабыла нічыю з футбалістамі Босніі і Герцагавіны — 1:1. Румыны разграмілі ў сябе дома аўтсайдэра каманду Сан-Марына — 7:1. Выніковае становішча: Аўстрыя — 19 ачкоў, Боснія і Герцагавіна — 17, Румынія — 13, Кіпр — 8, Сан-Марына — 0.

Футбалісты Бельгіі з лікам 7:0 разграмілі на сваім полі каманду Ліхтэнштэйна і сталі лепшымі ў квінтэце J. Другое месца заняла зборная Уэльса, якая не пакінула шанцаў на поспех паўночнамакедонцам — 7:1. Выніковае становішча: Бельгія — 18 ачкоў, Уэльс — 16, Паўночная Македонія — 13, Казахстан — 8, Ліхтэнштэйн — 0.

Раней завяршыліся турніры ў астатніх групах. Зборная Нарвегіі паказала выдатную гульню, атрымаўшы восем вікторый у васьмі матчах групы I, прычым паўночнікі двойчы разграмілі каманду Італіі — 3:0 (дома) і 4:1 (у гасцях). Лідар нарвежскай дружыны Эрлінг Холан стаў лепшым бамбардзірам еўрапейскага адборачнага турніру, забіўшы 16 мячоў. Зборная Англіі таксама набрала 24 ачкі з 24-х магчымых і аказалася адзінай, хто не прапусціў ніводнага гола.

Такім чынам, прамыя пропускі ў фінал сусветнага першынства ад Еўропы заваявалі зборныя Англіі, Францыі, Нідэрландаў, Германіі, Нарвегіі, Партугаліі, Харватыі, Шатландыі, Бельгіі, Швейцарыі, Іспаніі і Аўстрыі.

Футбалісты Украіны, Польшчы, Чэхіі, Славакіі, Ірландыі, Італіі, Даніі, Турцыі, Уэльса, Босніі і Герцагавіны, Албаніі і Косава згуляюць у стыкавых паядынках. Па выніках Лігі нацый у стыках таксама выступяць зборныя Швецыі, Паўночнай Ірландыі, Румыніі і Паўночнай Македоніі. Стыкавыя паядынкі адбудуцца 26 і 31 сакавіка 2026 года.

Фінальны турнір 23-га па ліку чэмпіянату свету адбудзецца з 11 чэрвеня па 19 ліпеня. Упершыню ў гісторыі матчы пройдуць адразу ў трох краінах — ЗША, Канадзе і Мексіцы. Таксама ўпершыню ў фінальнай стадыі планетарнага футбольнага форуму прымуць удзел 48 каманд, у мінулыя гады іх было не больш за 32.