У штогадовым пасяджэнні ўдзельнічаюць міністр па надзвычайных сітуацыях Рэспублікі Беларусь Вадзім Сіняўскі, міністр Расійскай Федэрацыі па справах грамадзянскай абароны, надзвычайных сітуацыях і ліквідацыі наступстваў стыхійных бедстваў Аляксандр Куранкоў і міністр па надзвычайных сітуацыях Казахстана Мурат Муханаў.
Калегіяльны орган выратавальных службаў Беларусі, Казахстана і Расіі створаны для каардынацыі сумеснай працы па абароне людзей і тэрыторый ад надзвычайных сітуацый:
— Аб’ядноўваючы нашы веды, тэхналогіі і практыкі, мы разам ствараем адзіную прастору бяспекі, разам удасканальваем метады абароны ад надзвычайных сітуацый і навыкі рэагавання, — адзначыў Вадзім Сіняўскі. — Супрацоўніцтва нашых выратавальных ведамстваў выбудавана на трывалым падмурку шматгадовых добрасуседскіх адносін нашых дзяржаў — Беларусі, Казахстана і Расіі, эфектыўных у першую чаргу дзякуючы ўзаемадзеянню кіраўнікоў дзяржаў, якое стварае надзейную аснову і стратэгічны вектар для ўсіх сумесных ініцыятыў.
Сёлета бакі абмяркуюць укараненне перадавых тэхналогій у вытворчасць пажарнай і аварыйна-выратавальнай тэхнікі, інавацыйныя падыходы да ліквідацыі надзвычайных сітуацый на электратранспарце, а таксама ўдасканаленне сістэм маніторынгу і прагназавання пажараў і правядзення выратавальных работ у горнай мясцовасці са скальным рэльефам.
У МНС Беларусі падкрэслілі: за гады дзейнасці сумесная калегія стала пляцоўкай для выпрацоўкі як стратэгічных, так і практычных рашэнняў, накіраваных на ўмацаванне бяспекі насельніцтва, аб’ектаў эканомікі і крытычнай інфраструктуры ад шырокага кола сучасных выклікаў і пагроз. Акрамя трохбаковага парадку дня, кіраўнікі выратавальных ведамстваў засяроджаць увагу на прасоўванні агульных інтарэсаў у рамках СНД, АДКБ, ЕАЭС і іншых міжнародных структур.
Аміна НАЗАРАВА
Фота МНС Беларусі
