Пры высокай тэмпературы летам асаблівую ўвагу трэба надаваць бяспецы дзяцей. 

«Перад выхадам на сонца наносьце на адкрытыя ўчасткі скуры дзіцяці сонцаахоўны крэм з высокім узроўнем абароны (не менш як SPF 25–35). Крэм выкарыстоўвайце за 15–20 хвілін да выхаду на вуліцу, а таксама адразу пасля кожнага купання. Падчас прагулак дзіця абавязкова павінна знаходзіцца ў галаўным уборы (панама, кепка, хустка) светлых тонаў. Адзенне павінна быць лёгкім, свабодным, з натуральных тканін (бавоўна, лён), якія забяспечваюць паветраабмен і вільгацепранікальнасць», — падкрэслілі ў Рэспубліканскім цэнтры гігіены, эпідэміялогіі і грамадскага здароўя.

Спецыялісты не рэкамендуюць знаходзіцца пад прамымі сонечнымі прамянямі на працягу ўсяго дня. Аптымальны час для прагулак і актыўнага адпачынку — ранішнія гадзіны (да 12-й гадзіны) і вячэрнія (пасля 16-й гадзіны). Пры гэтым у пасляабедзенны перыяд, пры максімальнай інсаляцыі, рэкамендуецца арганізаваць для дзіцяці дзённы сон працягласцю 1,5–2 гадзіны або спакойныя заняткі ў цені. Працягласць экскурсій з дзецьмі не павінна перавышаць трох гадзін. Пры планаванні паездкі варта чаргаваць пазнавальную частку (агляд славутасцяў, наведванне музеяў) з перыядамі адпачынку і забаўкамі.

Загараць дзецям пад адкрытымі сонечнымі прамянямі рэкамендуецца толькі пры тэмпературы паветра не вышэй за 24 градусы цяпла. Працягласць бесперапыннага знаходжання на сонцы не павінна перавышаць 30 хвілін. Лепшы час для загарання — з 10:00 да 12:00. Пры гэтым пасля загарання неабходна знаходзіцца ў цені не менш як 10–15 хвілін.

Купанне дзяцей у адкрытых вадаёмах дазваляецца толькі ў спецыяльна адведзеных і абсталяваных месцах. Забараняецца купанне ў вадаёмах, дзе жывуць вадаплаўныя птушкі (дзікія качкі і г.д.), паколькі яны з’яўляюцца пераносчыкамі паразітаў, якія выклікаюць сверб і дэрматыты. Аптымальная тэмпература вады для купання — не ніжэй за 20 градусаў вышэй за нуль, тэмпература паветра — не ніжэй за 23 градусы цяпла. «Катэгарычна забараняецца ўваходзіць у ваду ў разгарачаным стане — адразу пасля інтэнсіўных фізічных нагрузак, спартыўных гульняў або працяглага знаходжання на сонцы. Перад купаннем дайце арганізму астыць у цені на працягу 10–15 хвілін. Падчас знаходжання ў вадзе дзіцяці варта актыўна рухацца (плаваць, выконваць грабкі), каб пазбегнуць пераахаладжэння. Пры з’яўленні першых прыкмет астуджэння („гусіная скура“, дрыжыкі, пасіненне носа, вуснаў, вушэй) купанне трэба неадкладна спыніць і прыняць меры для сагравання дзіцяці (расціранне ручніком, пераапрананне ў сухое адзенне, знаходжанне ў цёплым памяшканні)», — адзначылі спецыялісты.

Таксама неабходна сачыць за пітным рэжымам дзіцяці. Варта прапаноўваць яму ваду малымі порцыямі кожныя 20–30 хвілін, асабліва падчас актыўных гульняў і фізічнай нагрузкі.

Пры ўзнікненні ў дзіцяці сімптомаў цеплавога перагрэву (млявасць, галаўны боль, млоснасць, пачырваненне скурных пакроваў, пачашчанае сэрцабіцце) неабходна неадкладна адвесці яго ў цень або ў ахалоджанае памяшканне, забяспечыць доступ свежага паветра, прапанаваць прахалоднае пітво, намачыць твар і запясці вадой. Пры пагаршэнні стану трэба звярнуцца па медыцынскую дапамогу.