Не ўсе атрымліваюць ад цёплых веснавых дзён толькі прыемнае. Прычынай дрэннага настрою і самадчування можа быць паліноз або сезонны алергічны рынакан’юктывіт, які ўзнікае з-за рэакцыі імуннай сістэмы на пылок раслін, расказвае валеолаг Мінскага абласнога цэнтра гігіены і грамадскага здароўя Юлія Клімчанка.
У нашых шыротах выдзяляюць тры асноўныя перыяды цвіцення раслін з пылком, які валодае алергеннымі ўласцівасцямі:
- красавік-май — час цвіцення ветраапыляльных дрэў: дуба, бярозы, ясеня, вяза, алешыны, вярбы;
- чэрвень-жнівень — пыляць зёлкавыя травы: мятлік, авёс, жыта, пырнік, цімафееўка, мятлік лугавы;
- жнівень-верасень — перыяд цвіцення пустазельнай травы: палыну, лебяды, амброзіі.
Выяўляецца хвароба слёзацёкам, святлабояззю, пачырваненнем кан’юнктывы і вочных склер, адчуваннем пяску ў вачах, свербам і ацёкам павекаў, чханнем, закладзенасцю носа, празмернымі выдзяленнямі з яго, павышанай раздражняльнасцю, парушэннямі сну. Без адэкватнага лячэння можа развіцца алергічны бранхіт, стэназіруючы ларынгатрахеіт, бранхіяльная астма. Схіляюць да палінозу спадчыннасць, іншыя алергічныя і частыя рэспіраторныя захворванні, курэнне, пражыванне ў месцах з неспрыяльным экалагічным становішчам (сярод гараджан паліноз сустракаецца ў 4-6 разоў часцей, чым у сельскіх жыхароў).
У людзей, якія пакутуюць палінозам, часта назіраецца так званая перакрыжаваная харчовая алергія. Алергічная рэакцыя ўзнікае на прадукт, у склад якога ўваходзяць структуры, падобныя з алергенамі пылка. Сімптомы харчовай алергіі — пяршэнне ў горле, кашаль, ацёк слізістых абалонак насаглоткі і ротавай паражніны, высыпанні, сверб скуры. Напрыклад, пры палінозе з рэакцыяй на пылок дрэў перакрыжаванай рэакцыяй можа быць алергія на арэхі (асабліва фундук), бярозавы сок, персікі, слівы.
Цалкам ухіліць кантакт з пылком у перыяд цвіцення не атрымаецца, таму прытрымвайцеся базавых рэкамендацый:
- абмяжуйце выезды на прыроду;
- выкарыстоўвайце спецыяльныя назальныя фільтры, маскі і сонцаахоўныя акуляры;
- прымайце душ, змяняйце і мыйце адзенне — часціцы пылка зназапашваюцца на яго паверхні;
- шчыльна зачыняйце вокны і дзверы, фільтруйце паветра ў жылым памяшканні;
- як мага часцей праводзіце вільготную ўборку, пазбаўцеся ад «пылазборнікаў» (дываны, мяккія цацкі), рэгулярна сцірайце фіранкі;
- выключыце з рацыёну перакрыжаваныя алергены;
- не выкарыстоўвайце для лячэння і прафілактыкі лекавыя расліны (нават бяспечныя для вас віды могуць несці на паверхні алергенны пылок іншых раслін);
- прамыванне носа солевымі растворамі і выкарыстанне слёзазаменнікаў для вачэй спрыяюць выдаленню алергенаў.
