Стаўка на эфектыўнасць
Годам раней на гэтай пляцоўцы абмяркоўваўся праект Праграмы сацыяльна-эканамічнага развіцця на 2026–2030 гады, таму сёлета на парадак дня выйшлі пошук больш эфектыўных рашэнняў пастаўленых задач і новыя патэнцыяльныя пункты росту эканомікі. Гэта падкрэсліў першы намеснік Прэм’ер-міністра Мікалай СНАПКОЎ.
«Ключавая ідэя Праграмы — пабудова самадастатковай і канкурэнтаздольнай дзяржавы, у цэнтры ўвагі якой — чалавек і пераход да новай якасці жыцця кожнага беларуса, — адзначыў ён. — Дэмаграфічная бяспека, развіццё чалавечага патэнцыялу, якаснае асяроддзе для жыцця, рост канкурэнтаздольнасці і паскарэнне тэхналагічнага развіцця, моцныя рэгіёны, умацаванне абараназдольнасці, рэалізацыя турыстычнага патэнцыялу — па кожным з гэтых прыярытэтаў пастаўлены канкрэтныя мэты».
Аднак, падкрэсліў першы намеснік Прэм’ер-міністра, мала проста весці ўлік дасягненняў гэтых мэт — трэба раней за іншых бачыць рызыкі, прапаноўваць рашэнні, якія спрацуюць ва ўмовах высокай няпэўнасці на знешнім контуры. І рабіць стаўку на эфектыўнасць — імкнуцца да таго, каб кожнае рашэнне спрыяла росту прадукцыйнасці, даходаў і дабрабыту людзей. «Запыт урада на якасную экспертызу, абгрунтаваныя прагнозы і практычныя рэкамендацыі ўвесь час расце, — адзначыў Мікалай Снапкоў. — Упэўнены, што выпрацаваныя ў ходзе канферэнцыі прапановы будуць запатрабаваны пры падрыхтоўцы рашэнняў органаў дзяржаўнага кіравання і дапамогуць забяспечыць устойлівае і збалансаванае развіццё Беларусі».
Новыя выклікі і тэндэнцыі
Як ужо адзначалася, на працягу апошніх некалькіх гадоў айчынныя прадпрыемствы, арганізацыі, ды і наша дзяржава ў цэлым функцыянуюць ва ўмовах зменлівых, асабліва знешніх, умоў. Прагназуючы іх, варта разумець: уваходныя параметры здольныя змяніцца ўжо заўтра. Геапалітычныя працэсы спараджаюць настолькі шырокі спектр варыянтаў будучыні, што органам дзяржкіравання даводзіцца ўвесь час быць у мабілізацыйнай гатоўнасці. Адначасова складаюцца і новыя тэндэнцыі тэхналагічнага развіцця, якія патрабуюць у тым ліку новых рашэнняў у сферы іх прававога і нарматыўнага рэгулявання. Прамаруджванне тут пагражае тармажэннем развіцця краіны.
Менавіта таму Беларусь павінна стаць краінай з развітой лічбавай індустрыяй і ўласнымі прарыўнымі тэхналогіямі. А значыць, важна ўзняць навукаёмістасць эканомікі, наладзіць камерцыялізацыю распрацовак, больш шырока ўкараняць штучны інтэлект і лічбавыя платформы — як у галінах, так і ў дзяржкіраванні. Неабходным бачыцца, падкрэсліў Мікалай Снапкоў, павышэнне аддачы ад інтэграцыі, пашырэнне супрацоўніцтва з Кітайскай Народнай Рэспублікай, краінамі СНД, ШАС, БРІКС і не толькі.
Старшыня Пастаяннай камісіі Савета Рэспублікі па эканоміцы, бюджэце і фінансах Раман БРОДАЎ адзначыў, што ва ўмовах глабальных перамен і знешніх пагроз каштоўнасць навуковага погляду асабліва вялікая: «Рэалістычны прагноз і аб’ектыўная ацэнка рызык — аснова вывераных кіраўніцкіх рашэнняў».
Як і куды расці
У сваю чаргу міністр эканомікі Юрый ЧАБАТАР нагадаў — фармулюючы ініцыятывы для вырашэння тых ці іншых пытанняў неабходна трымацца наступных крытэрыяў іх абгрунтаванасці:
— Па-першае, вымерны ўклад у эканоміку. Размова ідзе аб прыросце дабаўленай вартасці, прадукцыйнасці працы, экспарту. Па-другое, наяўнасць рынку: калі прадукцыю няма дзе прадаваць, ніякія ўкладанні сябе не апраўдаюць. Па-трэцяе, забяспечанасць рэсурсамі, у першую чаргу кадрамі, — гэта цяпер самае вузкае месца. Па-чацвёртае, цана пытання для дзяржавы. У любой меры падтрымкі яна ёсць. Гэта выпадаючыя даходы бюджэту, ільготныя крэдыты, гарантыі, — адзначыў міністр.
Паводле яго слоў, неабходна ясна разумець, які эканамічны эфект дае рубель падатковай ільготы і бюджэтных інвестыцый, і не прымяняць інструменты, што не працуюць.
Але ў Беларусі ёсць магчымасць эканамічнага развіцця і на ўжо існуючых кірунках, рэзервах. Напрыклад, у традыцыйных галінах для гэтага неабходна больш поўная загрузка існуючых магутнасцяў, абнаўленне абсталявання, паглыбленне перапрацоўкі ўласнай сыравіны. А тэхналогіі штучнага інтэлекту, лічбавыя платформы і рабатызацыя могуць стаць інструментамі росту прадукцыйнасці канкрэтных прадпрыемстваў.
Аміна НАЗАРАВА
Фота БелТА
Дарэчы
Сярод удзельнікаў Міжнароднай навуковай канферэнцыі «Праблемы прагназавання і дзяржаўнага рэгулявання сацыяльна-эканамічнага развіцця» — прадстаўнікі розных краін свету. Заяўкі і тэзісы паступілі ад экспертаў з Казахстана, Туркменістана, Узбекістана, Кітайскай Народнай Рэспублікі, Лівана, расказала дырэктар НДЭІ Міністэрства эканомікі Наталля БЕРЧАНКА:
— Мы ставілі перад сабой задачу зрабіць мерапрыемства максімальна практыка-арыентаваным. Архітэктура канферэнцыі атрымалася прадметна сфакусіраванай на пытаннях, якія знаходзяцца сёння ў полі зроку органаў дзяржаўнага кіравання. На базе кожнай секцыі прадугледжана правядзенне тэматычных круглых сталоў з удзелам профільных экспертаў і прадстаўнікоў органаў-рэгулятараў. Спадзяёмся, што кожны ўдзельнік канферэнцыі не толькі знойдзе цікавасць і карысць ад удзелу ў яе мерапрыемствах, але і ўнясе свой уклад у падрыхтоўку выніковых рэкамендацый.
