Пагадзіцеся, прыемна вяртацца з працы дадому, калі не толькі ва ўласнай кватэры, але і каля пад’езда, і ў найбліжэйшым двары тэрыторыя выглядае чыстай і добраўпарадкаванай. І калі ў прыватным доме даглядаць кветнікі, прыбіраць смецце і шмат іншых спраў — твае абавязкі, жыхарам шматкватэрных дамоў прасцей — за гэта пераважна адказваюць супрацоўнікі адказных службаў. Аднак ёсць і тыя неабыякавыя грамадзяне-энтузіясты, якія далучаюцца да калегіяльных органаў тэрытарыяльнага грамадскага самакіравання (далей — КОТГС), каб дапамагчы ў добраўпарадкаванні. Сёлетнія вынікі іх дзейнасці абмеркавалі ў Мінскім гарвыканкаме.
Асаблівасць КОТГСаў — функцыянаванне на абсалютна добраахвотнай аснове, у сувязі з чым узнікаюць кадравыя перастаноўкі і пэўны недахоп пераемнасці. Нягледзячы на гэта, неабыякавыя мінчане ўсё роўна працягваюць далучацца і прыкладваць намаганні дзеля развіцця горада. Больш за тое, у найбліжэйшыя гады заканадаўства аб мясцовым самакіраванні будзе мяняцца, што дазволіць КОТГСам развіваць шэраг перспектыўных кірункаў. У непасрэднай звязцы з імі павінны працаваць ТГСы і памочнікі дэпутатаў. На гэта падчас семінара ў Мінскім гарвыканкаме па выніках дзейнасці калегіяльных органаў тэрытарыяльнага грамадскага самакіравання ў 2025 годзе звярнуў увагу старшыня Мінскага гарадскога Савета дэпутатаў Арцём ЦУРАН.
Ён таксама закрануў тэму Года добраўпарадкавання, рэалізацыі грамадзянскіх ініцыятыў і правядзення конкурсу на найлепшы КОТГС. Сёлетні пераможца старшыня КОТГС № 4 Першамайскага раёна Ніна МОРДЗІК падзялілася сваім вопытам.
Жанчына акцэнтавала ўвагу, што чакаць людзей у кабінеце, калі надыходзіць час прыёму грамадзян, — не вельмі эфектыўны прыём.
Яна ставіць столік проста на вуліцы — так людзі з ахвотай падыходзяць са сваімі пытаннямі і прапановамі.
«Да добраўпарадкавання прыцягваем дзяцей, моладзь, ёсць спецыяльныя клумбы, за якія яны адказныя, — расказала Ніна Мордзік. — Ім вельмі падабаецца: яны пераймаюць вопыт у суседзяў, імкнуцца зрабіць лепш і цікавей. Дзякуючы грамадзянскай ініцыятыве для моладзі Першамайскага раёна таксама ўстанавілі спартыўны комплекс — і гэта толькі невялікая частка нашай работы. Што датычыцца грамадзянскіх ініцыятыў, яны сёлета, сапраўды, атрымалі новы імпульс і развіццё».
Старшыня КОТГС № 130 ЖЭУ № 2 Фрунзенскага раёна Анжаліка КУХАРЧЫК расказала аб выніках сваёй работы ў мясцовым самакіраванні: «За пяць гадоў зроблена даволі шмат. Акультураныя чатыры футбольныя і валейбольныя пляцоўкі.
Сумесна з адміністрацыяй Фрунзенскага раёна і „Зелянбудам“ на закінутай пляцоўцы створаны парк „Сямейнае дрэва“: устанавілі мангалы, сталы, месца для гульняў дзяцей і не толькі».
Падчас семінара прадстаўнікі мясцовага самакіравання задавалі шмат пытанняў, якія датычыліся ўстаноўкі і замены дзіцячага гульнявога абсталявання, добраўпарадкавання дваровых тэрыторый, аднаўлення тэрыторый пасля правядзення капітальнага рамонту, рэалізацыі грамадзянскіх ініцыятыў і іншых тэм.
Як падкрэсліў Арцём Цуран, дэпутацкі корпус разлічвае, што ў 2026-м праектаў-пераможцаў грамадзянскіх ініцыятыў стане яшчэ больш, паколькі людзі бачаць, што гэта рэальна працуе. КОТГСы ў сваю чаргу — гэта ў пэўным сэнсе злучальны ланцужок паміж уладамі і мінчанамі, якія могуць сабрацца разам, абмеркаваць і вырашыць, як лепш добраўпарадкаваць свой двор. Варта нагадаць, што на тэрыторыі горада Мінска функцыянуюць 118 калегіяльных органаў тэрытарыяльнага грамадскага самакіравання. Каардынацыю іх дзейнасці ажыццяўляе Мінскі гарадскі Савет дэпутатаў.
Яна ВАЛАСАЧ
Фота БелТА
