«У сусветнай практыцы найбольш папулярнымі відамі каштоўных папер з’яўляюцца акцыі і аблігацыі. Акцыя — гэта доля ў капітале кампаніі. Перад купляй акцый рэкамендуецца вывучыць гісторыю эмітэнта на Адзіным партале фінансавага рынку», — адзначыў Анатоль Шаршун. Партал функцыянуе з 2016 года і змяшчае справаздачнасць і інфармацыю аб істотных падзеях кампаній, уключаючы гісторыю выплаты дывідэндаў. Адсутнасць выплат у мінулым можа казаць пра тое, што іх не будзе і ў далейшым, хоць дывідэнтная палітыка можа мяняцца ў залежнасці ад стратэгічных мэт акцыянернага таварыства.

Аблігацыі — пазыковы інструмент, які дазваляе ўкласці грошы ў пэўнага эмітэнта і праз нейкі прамежак часу атрымаць даходнасць, заяўленую ў эмісійных дакументах. «Хоць па аб’ёме эмісіі рынкі карпаратыўных аблігацый і акцый прыкладна парытэтныя, але з пункту гледжання актыўнасці аперацый пазыковы сегмент з’яўляецца больш папулярным. Адно з тлумачэнняў гэтаму — непрафесійныя інвестары аддаюць перавагу простаму прымнажэнню капіталу», — канстатаваў прадстаўнік Мінфіна. 

Галоўнымі прынцыпамі работы на фондавым рынку застаюцца дыверсіфікацыя інвестыцый і кантроль за суадносінамі рызыкі і даходнасці. Грамадзянам, зацікаўленым у куплі каштоўных папер, рэкамендуецца фарміраваць партфель з максімальна шырокага кола эмітэнтаў. Важна памятаць: абяцанне высокіх даходаў заўсёды звязана з павышанымі рызыкамі незвароту ўкладанняў. «Калі стаўкі ў сярэднім па рынку складаюць крыху вышэй за стаўку рэфінансавання, а вам прапануюць 30%, 50%, 100% ці нават 200% гадавых, то гэта цягне велізарную рызыку страты інвестыцый. Трэба цвяроза глядзець на эканамічныя працэсы і разумець, што цудаў у свеце не бывае», — падкрэсліў Анатоль Шаршун.

Фінансавыя інструменты найбольш надзейных беларускіх эмітэнтаў уключаюцца ў каціравальныя лісты Беларускай валютна-фондавай біржы. «Але трэба разумець, што чым вышэй надзейнасць фінансавага інструмента, тым патэнцыйна ніжэй будзе заяўленая прыбытковасць. Надзейнаму эмітэнту не патрабуецца вельмі моцна павышаць стаўку, каб прыцягнуць адпаведныя інвестыцыі», — дадаў дырэктар Дэпартамента па каштоўных паперах.

Грамадзяне могуць самастойна аддалена набываць каштоўныя паперы праз фінансавы маркетплэйс «Фінмаркет». Акрамя таго, шэраг прафесійных удзельнікаў рынку прапануе ўласныя лічбавыя платформы.

У краіне адкрыта каля 1 млн рахункаў па каштоўных паперах, аднак далёка не ўсе рахункі актыўныя. Агульны аб’ём эмісіі карпаратыўных каштоўных папер складае каля 90 млрд рублёў. Аб’ём аперацый на карпаратыўным сегменце рынку каштоўных папер Беларусі за 9 месяцаў дасягнуў 13,9 млрд рублёў, што на 27% вышэй за паказчык аналагічнага перыяду 2025 года. Дынаміка на рынку каштоўных папер з’яўляецца станоўчай.