Малады чалавек, 24-гадовы жыхар Лунінца, прыдумаў спосаб заробку, выкарыстоўваючы даверлівасць грамадзян і ананімнасць, якую гарантуе Інтэрнэт. 

Праглядаючы ў месенджары групу з аб’явамі суіскальнікаў арэнднага жылля, ён знаходзіў «кліента» і звязваўся з ім, прапаноўваючы нібыта наяўнае ў яго жыллё ў горадзе Мінску для арэнды. Дамовіўшыся аб кошце паслугі, малады чалавек даваў інфармацыю аб банкаўскай карце, куды трэба было залічыць плату за арэнду. Атрыманыя грашовыя сродкі ён адразу траціў на стаўкі ў інтэрнэт-казіно. Падманутым жа грамадзянам паведамляў выдуманую прычыну, па якой арэндная кватэра не можа быць здадзена ў названы тэрмін, і абяцаў вярнуць грошы, але абяцанне сваё не выконваў.

Так, сярод яго «кліентаў» аказаўся 21-гадовы жыхар горада Мінска, які аддаў за права пражываць у арэндным жыллі больш за 800 рублёў. Другой ахвярай аферыста стаў 23-гадовы жыхар сталіцы, які перадаў за кватэру звыш 100 рублёў. Цяпер устанаўліваюцца іншыя грамадзяне, якія пацярпелі ад «дзейнасці» лунінчаніна.

Дарэчы, раней малады чалавек ужо прыцягваўся да крымінальнай адказнасці за такія дзеянні. І на гэты раз дзейнасць «прадпрымальнага» арэндадаўцы была ацэнена праваахоўнікамі згодна з літарай Закона. На яго завялі крымінальную справу за махлярства.

Вартавыя парадку нагадваюць, што Інтэрнэт, напоўнены прывабнымі прапановамі выгод і паслуг, тоіць у сабе шмат небяспек. Часта кіберпрастора выкарыстоўваецца ашуканцамі для завалодвання грашовымі сродкамі наіўных грамадзян. Таму трэба быць максімальна пільнымі і асцярожнымі.

Варта насцярожыцца і адмовіцца ад здзелкі, калі:

арэндадаўца просіць залог, аванс або «рэгістрацыйны ўзнос» да прагляду або падпісання дагавора;

уласнік «міфічнай» кватэры, які выйшаў з вамі на сувязь, адмаўляецца паказваць жыллё;

«інфа-агенцтвы» просяць аплату за паслугі да фактычнага засялення;

арэндадаўца на вас цісне, каб «хутчэй унеслі аплату, пакуль не знялі»;

зносіны з арэндадаўцам адбываюцца толькі ў сацсетках;

арэндадаўцы адмаўляюцца паказаць дакументы на кватэру.

Як сябе абараніць?

Агляд абавязковы: ніколі не плаціце грошы (залог, аванс) да асабістага агляду жылля.

Праверка дакументаў: патрабуйце ва ўласніка пашпарт і дакументы на кватэру (пасведчанне аб праве ўласнасці).

Дагавор: заключайце афіцыйны дагавор найму з дакладна прапісанымі ўмовамі і сумамі.

Спосаб аплаты: не пераводзьце грошы на карты фізічных асоб, а тым больш не ўносьце «аванс» без дагавора; калі залог — то ён павінен быць прапісаны ў дагаворы.

Кошт: занадта нізкая цана — дакладная прыкмета махлярства.

Агенцтва: правярайце рэпутацыю агенцтва, а аплату паслуг рыэлтара — толькі пасля падпісання дагавора з ім.

Бяспека: не адпраўляйце сканы пашпарта да падпісання дагавора.