Начальнік упраўлення культуры Мінгарвыканкама Кацярына Лучына падрабязна расказала, якой будзе праграма 9 і 10 мая. 

Пляцоўка каля Палаца спорту

— Традыцыйна святкаванне Дня Перамогі ў Мінску будзе маштабным. Галоўная гарадская пляцоўка — каля Палаца спорту. Яна будзе працаваць з 12.00 да 23.00, — расказала спікер. — Там падрыхтавана яркая праграма: выступленні прафесійных і творчых калектываў, а таксама маладых выканаўцаў — пераможцаў розных конкурсаў і фестываляў.

Але сапраўднай разыначкай стане выступленне расійскага спевака Алега Газманава. Яно запланаванае па завяршэнні работы гэтай пляцоўкі.

У Лошыцкім парку — «Школа маладога байца»

Яшчэ адна значная лакацыя — Лошыцкі парк.

— Там з 12.00 да 19.00 будзе працаваць вялікая гістарычная рэканструкцыя «Школа маладога байца», — адзначыла Кацярына Лучына.

Акрамя таго, кожны раён Мінска падрыхтаваў сваю пляцоўку. Сёлета іх больш за 20. Пераважна гэта паркавыя зоны. Там — канцэрты, спартыўныя спаборніцтвы, кірмашы, інтэлектуальныя шоу і многае іншае.

Канцэрт каля Палаца спорту 10 мая

Арганізатары падкрэсліваюць: два дні — 9 і 10 мая — у Мінску выхадныя, таму свята вырашылі працягнуць.

— Каля Палаца спорту праграма будзе працягвацца. 10-га чысла там таксама адбудзецца канцэрт з удзелам беларускіх артыстаў, — паведаміла спікер.

Феерверк у шасці пунктах — у 23.00

Завяршэннем усіх урачыстасцяў стане яркі, каляровы феерверк. Сёлета ён запланаваны адразу на некалькіх пляцоўках:

•  пляцоўка каля «Чыжоўка-Арэны»,

•  парк імя М. Паўлава,
  

•  сквер Старосцінская Слабада,

•  набярэжная Драздоў,

•  Нацыянальная бібліятэка.

— Цэнтральная пляцоўка, дзе можна паглядзець на салют, — гэта сквер Старасцінская Слабада, — удакладніла прадстаўнік гарадскіх улад.

Агульнанацыянальная хвіліна маўчання і фінальная песня

Асобна спікер папрасіла нагадаць пра вельмі важны момант:

— 9 Мая а 12.00 адбудзецца агульнанацыянальная хвіліна маўчання. Мы ўсе разам, усім горадам, ушануем памяць тых, хто загінуў у гады Вялікай Айчыннай вайны.

Акрамя таго, усе раённыя пляцоўкі будуць завяршаць сваю работу аднолькава — сумесным выкананнем песні «Дзень Перамогі».

— Гэта такі фінальны акорд, — удакладніла яна.

«Чакаем усіх»

— Мы запрашаем усіх жыхароў і гасцей сталіцы адзначыць разам з намі гэты вялікі для ўсіх святочны дзень, — падсумавала Кацярына Лучына.

Такім чынам, мінчан чакаюць два насычаныя дні: канцэрты, рэканструкцыі, дзіцячыя пляцоўкі, хвіліна маўчання, агульныя спевы «Дня Перамогі» і шасцікропкавы феерверк. Свята будзе — не прапусціце.

Надзея Зуева