У мінулую суботу сталіца святкавала сваё 959-годдзе. Сучасны горад з багатай гісторыяй у выхадныя сабраў мясцовых жыхароў і гасцей. З нагоды свята ў кожным раёне сталіцы былі арганізаваны канцэрты, фестывалі, спартыўныя спаборніцтвы, кірмашы і іншыя цікавыя актыўнасці.

Стартавала праграма з цырымоніі ўскладання кветак. У ёй узялі ўдзел прадстаўнікі ўлады і грамадскасці, кіраўніцтва горада, ветэраны, моладзь — кожны каля абеліска «Мінск — горад-герой» аддаў даніну памяці ўсім тым, хто ствараў мірную, светлую і паспяховую будучыню роднаму гораду.

На пляцоўцы музейна-паркавага комплексу «Перамога» прайшлі міжнародныя спаборніцтвы «Наймацнейшы пажарны-выратавальнік», у якіх паўдзельнічалі больш за 100 спартсменаў з усіх рэгіёнаў Беларусі і прадстаўнікоў Расіі, В’етнама і Сербіі. Сімвалічна, што мінскія ратавальнікі ўзялі «золата» на гэтых спаборніцтвах.

У цэнтральнай частцы горада ў суботу адбыўся фестываль гістарычнай рэканструкцыі «Мінск старажытны» — відовішчная падзея з удзелам 170 клубаў, якія прадставілі свае лакацыі. Галоўная адметнасць гістарычнага мерапрыемства ў тым, што ўдзельнікі прадэманстравалі ўсе 10 стагоддзяў, якія існуе сталіца.

Культурна-відовішчная праграма «Мінск маёй душы» разгарнулася ў святочны дзень каля Палаца спорту. Госці змаглі атрымаць асалоду ад выканання кампазіцый заслужаных і народных калектываў, маладзёжных творчых груп.

Узнагароды за карпатлівую працу

На плошчы Свабоды прайшла сімвалічная цырымонія ўзнагароджання «Мінчанін года», звання якога ўдастоіліся 13 работнікаў з розных галін.

Віншуючы найлепшых у сваёй прафесійнай дзейнасці з высокім званнем, старшыня Мінскага гарвыканкама Уладзімір КУХАРАЎ адзначыў, што свята сталіцы аб’ядноўвае многія пакаленні мінчан, якія на працягу доўгіх гадоў будавалі і добраўпарадкоўвалі горад.

«Сёння мы, нашчадкі тых выдатных людзей, павінны быць разам і рабіць усё, каб горад заставаўся такім жа ўтульным, прыгожым, квітнеючым і камфортным для пражывання, — падкрэсліў мэр Мінска. — Я хачу падзякаваць усім, хто бярэ ў гэтым удзел, застаючыся на сваім працоўным месцы. Сёння мы ўшаноўваем тых, хто дасягнуў у прадстаўляемых галінах сапраўднага майстэрства. Гэта вынік шматгадовай карпатлівай працы, удасканалення, заваявання новых вышынь. Вы —прыклад для іншых, вы — тыя, хто бярэцца за самую цяжкую працу, якая прыносіць радасць людзям і карысць нашаму гораду і краіне».

Для моладзі — «Бітва дыджэяў» і рэп-батл

У парку імя Горкага ў святочны дзень разгарнуўся фестываль прафесій — для тых, хто жадае знайсці сваё прызванне. Там жа для гасцей зладзілі канцэртную праграму, тэматычныя майстар-класы і выстаўкі.

Асноўнай лакацыяй маладзёжнага руху стаў парк 50-годдзя Вялікага Кастрычніка, дзе размясцілася пляцоўка для маладзёжных субкультур, пасля чаго пачалося вялікае шоу «Бітва дыджэяў». Яркай часткай мерапрыемства стала касплэй-дэфіле, канцэрт маладых рок-гуртоў і рэп-выканаўцаў, уключаючы рэп-батл. Актыўных маладых людзей таксама запрашалі на майстар-класы, паказальныя выступленні па такіх кірунках, як спартыўны скейтбордынг, самакаты, футбольны і баскетбольны фрыстайл, стрыт-варкаўт і многае іншае. Творчы блок прадставілі графіцісты, якія дэманстравалі майстэрства на фанерных экспазіцыях. Асобным элементам гэтай пляцоўкі стала экспазіцыя, дзе кожны малады чалавек змог пакінуць пажаданні любімаму гораду.

Хіты спявалі разам

Эпіцэнтрам вячэрніх святкаванняў Дня горада Мінска стала сцэна каля Палаца спорту, дзе прайшоў канцэрт. Хіты гледачам падарылі папулярныя беларускія выканаўцы, а хэдлайнерам шоу сёлета стаў расійскі спявак Акмаль. Адзначыць радасную падзею пад любімыя песні на Нямізе сабралася вялікая колькасць гледачоў — каля 80 тысяч чалавек!

Яркім завяршэннем грандыёзнага свята стала маштабнае піратэхнічнае феерверк-шоу. Неба над Мінскам асвяцілася тысячамі святочных агнёў. Яшчэ раз са святам, сталіца!

Валерый КАРТУЛЬ

Фота аўтара