З 10 сакавіка ў сталіцы афіцыйна стартуе вясенняя прыборка. У горадзе будуць не толькі прыбіраць, але і рамантаваць дарогі, высаджваць дрэвы і рэалізоўваць ініцыятывы саміх жыхароў. Асноўная нагрузка, традыцыйна, ляжа на камунальныя службы і прадпрыемствы, аднак без удзелу грамадскасці не абыдзецца.
Паводле распараджэння старшыні Мінгарвыканкама, агульнагарадскія мерапрыемствы па санітарным утрыманні і добраўпарадкаванні працягнуцца з 10 сакавіка да 25 красавіка. План работ, зацверджаны дэпутатамі яшчэ ў лютым, уключае шырокі спектр задач: ад рамонту дарог да высадкі зялёных насаджэнняў. І, што важна, кожную суботу да гэтых работ будуць далучацца неабыякавыя грамадзяне.
Як расказаў начальнік упраўлення гарадской гаспадаркі і энергетыкі Мінгарвыканкама Аляксандр Ракаўшчык, аб’ёмы рамонту вулічна-дарожнай сеткі ў гэтым годзе застануцца на ўзроўні мінулага. Каля двух мільёнаў квадратных метраў складзе рамонт дарог. 500 тысяч квадратных метраў адведзена на ўнутрыдваровыя тэрыторыі і праезды. Што датычыцца азелянення, то планы крыху скарэктаваны ў бок памяншэння, аднак чыноўнік спадзяецца на актыўнасць суб’ектаў гаспадарання.
— Думаю, дзякуючы прадпрыемствам мы выйдзем на леташнія лічбы: каля 50 тысяч дрэў і 250 тысяч кустоў, — адзначыў Аляксандр Ракаўшчык.
Асобная тэма — рэалізацыя грамадскіх ініцыятыў. Летась іх было ўсяго 14, і многія ахвотныя проста не змаглі трапіць у праграму з-за абмежаванага фінансавання. Нагадаем, што па ўмовах 10 % кошту работ аплачваюць самі грамадзяне, астатнія 90 % бярэ на сябе гарадскі бюджэт. Сёлета сітуацыя змянілася: у бюджэце-2026 закладзены неабходныя сродкі, і колькасць пераможцаў ініцыятыў вырасла амаль у тры разы.
— Сёлета будзе ўпарадкавана 39 дваровых тэрыторый з непасрэдным удзелам жыхароў, — паведаміў кіраўнік упраўлення.
У гэтым сезоне асаблівы акцэнт зроблены на навядзенні парадку на прамысловых пляцоўках, у лясных і паркавых зонах. Будзе ўзмоцнены кантроль за выездам тэхнікі з будаўнічых пляцовак і прадпрыемстваў: ніхто не павінен выязджаць на гарадскія дарогі з бруднымі коламі.
— 49 % тэрыторыі сталіцы замацаваны за прадпрыемствамі і арганізацыямі горада. Яны будуць прыбіраць свае ўчасткі. Асноўная нагрузка па ачыстцы грамадскіх месцаў, вядома, ляжа на камунальныя службы, — удакладніў Аляксандр Ракаўшчык.
Першы масавы выхад на прыборку запланаваны ўжо на гэтым тыдні. Камунальнікі спадзяюцца, што надвор’е не падвядзе, а галоўнае — каб усе ўсвядомілі: чысціня горада пачынаецца з асабістага ўдзелу кожнага.
Надзея ЗУЕВА
