У 2025 годзе ў Беларусі адбылося 4880 ДТЗ з удзелам дзікіх жывёл, у 2024 годзе — 3381 выпадак. Паводле слоў Сяргея Кабака, колькасць такіх здарэнняў расце паралельна з павелічэннем колькасці жывёл і ўзроўнем аўтамабілізацыі, пры гэтым аналагічная сітуацыя назіраецца і ў скандынаўскіх краінах.

«БелдарНДІ» па даручэнні Міністэрства транспарту і камунікацый распрацоўвае рэкамендацыі для зніжэння колькасці такіх здарэнняў. Плануецца абагульніць замежны і айчынны досвед, правесці доследныя работы і дапрацаваць інфраструктуру. Эксперт падкрэсліў, што вырашэнне праблемы патрабуе комплекснага падыходу і ўзаемадзеяння Мінтрансу, Міністэрства лясной гаспадаркі, МУС, а таксама Беларускага таварыства паляўнічых і рыбаловаў.

«Нягледзячы на высокія агульныя лічбы, колькасць уліковых ДТЗ, у якіх загінулі або атрымалі раненні людзі, застаецца даволі нізкай. Аналіз сведчыць пра тое, што асноўную праблему складаюць ДТЗ з ласямі — зафіксавана 26 такіх выпадкаў з гібеллю людзей, два — з аленямі. У 2026 годзе з 32 пацярпелых у ДТЗ таксама фігуруюць наезды на ласёў. Таму для пачатку можна звузіць праблему і засяродзіцца менавіта на гэтым відзе», — адзначыў Сяргей Кабак.

З боку Мінтрансу ўжо робяцца канкрэтныя крокі: уздоўж дарог усталёўваюцца ахоўныя сеткі, а папераджальныя знакі «Дзікія жывёлы» цяпер размяшчаюцца ў месцах патэнцыйнай небяспекі, вызначаных на аснове статыстыкі ДТЗ і міграцыі жывёл. Таксама ўладкоўваюцца пераходы ў розных узроўнях: жывёлапрагоны і экадукі. Пры гэтым Сяргей Кабак звярнуў увагу, што экадукі (пераходы над праезнай часткай) — пытанне спрэчнае, паколькі загнаць туды жывёлу, напрыклад лася з рагамі, вельмі складана, а стварэнне неабходнага ландшафту патрабуе значных выдаткаў і з’яўляецца вельмі спецыфічнай задачай