«Дзіцячы арганізм значна больш адчувальны да холаду, чым дарослы, — адзначаюць медыкі. — З-за асаблівасцяў тэрмарэгуляцыі, меншага пласта падскурна-тлушчавай клятчаткі і хутчэйшага цеплаабмену дзеці ўваходзяць у групу павышанай рызыкі па абмаражэннях».

Для прафілактыкі абмаражэнняў урачы рэкамендуюць кіравацца некалькімі прынцыпамі. Што да выбару адзення, то самы эфектыўны спосаб захаваць цяпло — стварыць паветраную праслойку. Першы пласт (вільгацеадводны) — тэрмабялізну з сінтэтыкі або сумесі шэрсці з сінтэтыкай. Бавоўна — дрэнны выбар, бо яна ўбірае пот, становіцца мокрай і хутка астуджае цела. Другім пластом (ізалюючым) можна выкарыстоўваць фліс, шчыльны трыкатаж ці ваўняны світар, трэцім (ахоўным) — куртку, штаны з мембраннай тканіны, якая не прапускае ваду і вецер, але «дыхае».

Рукавіцы лепш захоўваюць цеплыню, бо пальцы саграваюць адзін аднаго. Прычым лепш выбіраць непрамакальныя мадэлі. Боты не павінны быць цеснымі. Занадта вузкі абутак парушае кровазварот, што з’яўляецца галоўным фактарам хуткага абмаражэння. «Пакідайце месца для цёплых шкарпэтак і „вольнага ходу“ пальцаў, — звярнулі ўвагу спецыялісты. — Да 30% цяпла губляецца праз галаву. Шапка павінна закрываць вушы».

Перад выхадам на мароз дзіця павінна паесці. Энергія, атрыманая з ежы (асабліва складаных вугляводаў і тлушчаў), ідзе на абаграванне цела. Таксама важна прапанаваць цёплае пітво (гарбата, узвар) перад прагулкай і пасля яе, выкарыстоўваць адмысловыя крэмы без утрымання вады. Наносіць іх трэба за 20-30 хвілін да выхаду, каб яны паспелі ўвабрацца і стварыць ахоўную плёнку. Звычайныя ўвільгатняльныя крэмы на воднай аснове на марозе могуць толькі нашкодзіць.

Пры тэмпературы ніжэйшай за мінус 15 прагулкі павінны быць кароткімі (20-30 хвілін). Калі дзьме моцны вецер, рызыка абмаражэння ўзрастае нават пры мінус 5 — мінус 10 градусах. Таксама трэба сачыць, каб дзіця не стаяла доўга на адным месцы.

«Забараніце дзіцяці дакранацца голымі рукамі ці языком да металічных канструкцый (арэлі, турнікі). Метал валодае высокай цеплаправоднасцю і імгненна выклікае „халадавы апёк“. Зніміце ўпрыгожванні: завушніцы і пярсцёнкі з металу астуджаюцца хутчэй цела і могуць спрыяць абмаражэнню мочак вушэй ці пальцаў», — адзначылі медыкі.