Аляксандр Казарэз падкрэсліў, што беларускі мядзведзь не адрозніваецца агрэсіўнасцю. «Гэта частка папуляцыі, якая ўвесь час знаходзілася пад паляўнічым прэсам. Чалавек асацыюецца ў мядзведзяў з небяспекай, а не з крыніцай харчавання. Яны не маюць мэты напасці, укусіць або з’есці, аднак могуць узнікнуць сітуацыі, калі мядзведзіца будзе абараняць дзіцяня або калі чалавек аказваецца побач са здабычай мядзведзя», — сказаў ён.

Асноўныя дзеянні пры сутыкненні з мядзведзем — не ствараць мітусні. Не варта спрабаваць кантактаваць з жывёлай і здымаць відэа. «Сустрэўшы мядзведзя, трэба проста спакойна рэціравацца. Калі ён пачаў паводзіць сябе агрэсіўна, трэба паспрабаваць зрабіць сябе больш — падняць рукі і заплечнік уверх, гучна сябе пазначыць. Як правіла, мядзведзь адыходзіць», — дадаў эксперт.

Каб пазбегнуць сустрэчы з мядзведзем, трэба гучна перасоўвацца, размаўляць, ламаць галінкі. Звер пачуе гэта і сыдзе да сутыкнення з чалавекам.

Таксама начальнік аддзела паляўнічай гаспадаркі адзначыў, што нельга спрабаваць прыручыць мядзведзяня і любую іншую дзікую жывёлу. «Гэта небяспечна — рана ці позна звер на вас нападзе. Таксама гэта незаконна — канфіскацыя жывёл з дзікай прыроды забаронена. Лепшая дапамога для знойдзенага вамі звярка — не набліжацца і хутка пакінуць тэрыторыю, каб маці магла вярнуцца і шчасна яго забраць», — падкрэсліў ён.