У Міністэрстве па падатках і зборах растлумачылі БелТА нюансы падаткаабкладання даходаў фізічных асоб, атрыманых у выніку правядзення прамых эфіраў у сацсетцы TikTok.
Падчас прамых трансляцый у TikTok гледачы могуць купляць за манеты TikTok аніміраваныя віртуальныя падарункі — ад простых значкоў да складаных эфектаў — і адпраўляць іх аўтарам прамых эфіраў, у тым ліку каб падтрымаць іх кантэнт. TikTok налічвае аўтарам эфіраў (фізічным асобам) за падарункі віртуальныя балы — «алмазы». У далейшым, згодна з правіламі TikTok, назапашаныя «алмазы» канвертуюцца ў рэальныя грошы, якія можна вывесці на банкаўскія рахункі.
У Беларусі такія даходы абкладаюцца падаткам у наступным парадку. «Згодна з пунктам 1 артыкула 196 Падатковага кодэкса для фізічных асоб, якія прызнаюцца падатковымі рэзідэнтамі Беларусі, аб’ектам падаткаабкладання падаходным падаткам з фізічных асоб з’яўляюцца даходы, атрыманыя імі ад крыніц у краіне і (або) за яе межамі. Адпаведна, грашовыя сродкі, атрыманыя фізічнай асобай — падатковым рэзідэнтам Беларусі ад замежнай кампаніі — уладальніка інтэрнэт-платформы TikTok, падлягаюць падаткаабкладанню падаходным падаткам. Паколькі грашовыя сродкі атрыманы ад TikTok, яны не з’яўляюцца даходамі, атрыманымі ў дар ад фізічных асоб, і льготы, устаноўленыя артыкулам 208 Падатковага кодэкса, на такія даходы не распаўсюджваюцца», — растлумачылі ў МПЗ.
Падаходным падаткам абкладаецца ўся сума грашовых сродкаў, атрыманых ад інтэрнэт-платформы TikTok.
Падаходны падатак вылічвае падатковы орган на падставе падатковай дэкларацыі (разліку), якую фізічная асоба падае ў парадку, устаноўленым артыкулам 222 Падатковага кодэкса. Стаўка падатку складае 13%.
Калі фізічная асоба падчас прамых эфіраў у TikTok атрымлівае падарункі (данаты) у выглядзе грашовых сродкаў непасрэдна ад гледачоў — фізічных асоб (напрыклад, калі тыя пералічваюць грошы на банкаўскі рахунак аўтара), падаткаабкладанне такіх даходаў ажыццяўляецца з улікам ільгот, устаноўленых пунктамі артыкула 208 Падатковага кодэкса.