Дарэчы, раней аформіць пенсію трэба было ў органе па працы, занятасці і сацыяльнай абароне ў свой дзень нараджэння: жанчынам — у 58 гадоў, мужчынам — у 63 гады, то-бок у момант наступлення агульнаўстаноўленага пенсіённага ўзросту.

Спрошчаны парадак назначэння пенсій датычыцца толькі выплат па ўзросце — не па інваліднасці і з нагоды страты карміцеля. Па выплату па інваліднасці варта звяртацца на працягу трох месяцаў з дня ўстанаўлення групы інваліднасці, а па пенсію з нагоды страты карміцеля — на працягу 12 месяцаў з дня смерці карміцеля.

Хто павінен займацца зборам дакументаў?

Работадаўца абавязаны своечасова прадастаўляць дакументы для прызначэння пенсіі ў дачыненні да сваіх работнікаў. Ён нясе за гэта адказнасць. Яго задача — высветліць, ці ёсць неабходнасць запытваць даведкі аб зарплаце за перыяд працы да 1 студзеня 2003 года, калі ў краіне не вёўся персаніфікаваны электронны ўлік звестак аб работніках, а таксама праверыць карэктнасць унясення запісаў у працоўнай кніжцы і разабрацца, ці хапае даных аб стажы.

Калі па нейкіх прычынах чалавек не працаваў да дасягнення агульнаўстаноўленага пенсіённага ўзросту, тады яму давядзецца самастойна займацца зборам і перадачай усіх дакументаў. Першы крок — звярнуцца ва ўпраўленне па працы, занятасці і сацабароне па месцы жыхарства, дзе раскажуць, што неабходна зрабіць у залежнасці ад асаблівасцяў працоўнай біяграфіі.

Фота БелТА