Несумненна, цюбінг магчымы толькі на спецыяльнай трасе — з вылучанымі палосамі, дзе ўсе катаюцца строга па чарзе. На «ватрушцы» можа сядзець толькі адзін чалавек, трымаючыся за ручкі. Спартыўны снарад павінен быць не да канца напампаваны. 

Пры катанні вельмі важна пазбягаць месцаў, дзе ёсць дрэвы, слупы, рэчка, трампліны, агароджы, праезная частка — гэтыя перашкоды прыводзяць да траўмаў. Правільная горка — гэта расчышчаны снежны схіл.

Для малых трэба выбіраць тую горку, якая не вельмі крутая і дзе няма дзяцей старэйшага ўзросту. Калі на горцы натоўп, малога лепш адвесці на іншую горку. 

Катаючыся, важна выконваць чарговасць. З гары не спускаюцца, пакуль унізе не вызвалілі дарогу. 

Трэба ўмець правільна падаць. Лепш перавярнуцца або заваліцца на бок, чым сутыкнуцца з дрэвам або іншымі санкамі.

У Міністэрстве аховы здароўя таксама нагадалі, што трампліны, счэпкі санак і «ватрушак», прывязка іх да аўто небяспечныя.