Як расказаў начальнік другога аддзела ўпраўлення інфармацыі галоўнага ўпраўлення ідэалагічнай работы Міністэрства абароны Рэспублікі Беларусь, палкоўнік Аляксандр Кісель, сёння на розных узроўнях шмат робіцца для патрыятычнага выхавання падрастаючага пакалення:

— Ваеннае ведамства мерапрыемствы па патрыятычным выхаванні праводзіць сістэмна і комплексна. Выкарыстоўваюцца для гэтага разнастайныя формы і метады. Напрыклад, у час летніх канікул арганізоўваюцца ваенна-патрыятычныя лагеры на базе злучэнняў воінскіх часцей. За мінулы год такія лагеры наведала больш за 14 тысяч чалавек. Таксама штогод мы праводзім шэраг ваенна-патрыятычных гульняў, сярод якіх ужо вядомыя «Арлёнак», «Зарнічка», «Зарніца». І ахоп дзяцей па ўсёй краіне, якія бяруць у іх удзел, складае больш за 30 тысяч чалавек, — адзначыў ён.

Добра зарэкамендавалі сябе і традыцыйныя формы работы з дзецьмі і моладдзю: урокі мужнасці, дні адкрытых дзвярэй, прафарыентацыйныя мерапрыемствы, урокі міру. Актыўна далучаюць дзяцей і моладзь да работы ваенна-патрыятычных клубаў. Паводле слоў Аляксандра Кіселя, ва Узброеных Сілах на сёння створана ўжо звыш 60 такіх клубаў, што дае магчымасць выхоўваць больш за 2000 юных патрыётаў.

— Акрамя гэтага, рэалізоўваюцца сумесныя праекты з рэспубліканскімі грамадскімі аб’яднаннямі. Напрыклад, з «Патрыётамі Беларусі» на базе Ваеннай акадэміі мы праводзім ваенна-патрыятычны турнір «Выклік». А для студэнцкай моладзі праводзім ваенна-прыкладную гульню «Прарыў». З Беларускім дзіцячым фондам зараз рэалізоўваем акцыю «Ліст салдату», у якім хлопчыкі і дзяўчынкі могуць напісаць ліст нашым ваеннаслужачым, — дзеліцца Аляксандр Кісель. — І нашы армейскія творчыя калектывы важную ролю адыгрываюць у патрыятычным выхаванні. Асаблівай папулярнасцю карыстаюцца тэматычныя пляцоўкі, якія можна наведаць у знакавыя для краіны дні: Дзень Перамогі, Дзень Незалежнасці, Дзень абаронцаў Айчыны…

Дарэчы, сёлета такую лакацыю ўсе ахвотныя змогуць знайсці ў гандлёвых цэнтрах «Сталіца» і «Першы нацыянальны гандлёвы дом». Там пакажуць сучасныя ўзоры ўзбраенняў і ваеннай тэхнікі, можна будзе прымераць форму і абмундзіраванне, паўдзельнічаць у розных конкурсах і пачаставацца салдацкай кашай. Ваенна-тэматычныя пляцоўкі будуць працаваць з 12 да 17 гадзін.

Абмеркавалі таксама інавацыйныя формы і метады работы з моладдзю, уключаючы выкарыстанне сучасных інфармацыйных тэхналогій і сацыяльных сетак для прасоўвання патрыятычных каштоўнасцяў. Разгледзелі і пытанні далучэння моладзі да грамадска карыснай дзейнасці, развіцця патрыятычнага руху, падтрымкі маладзёжных ініцыятыў, накіраваных на захаванне гістарычнай памяці і культурнай спадчыны.

— Патрыятычнае выхаванне — значны фактар жыцця насельніцтва. Як правіла, усе сацыялагічныя апытанні аддаюць пальму першынства інстытуту сям’і ў выхаванні, але не менш важная роля ў гэтым працэсе — за ўстановамі адукацыі, арміяй. Апошняя, напрыклад, у людзей асацыіруецца з выхаваннем, дысцыплінай і прывіццём патрэбных якасцяў. Таму агульны поспех магчымы толькі пры комплексным падыходзе, — такім меркаваннем падзяліўся намеснік дырэктара па навуковай і інавацыйнай рабоце, кіраўнік Цэнтра паліталогіі Інстытута сацыялогіі НАН Беларусі Мікалай Сухоцкі.

Ён таксама расказаў, што, паводле сацыялагічных даследаванняў, патрыятычнае выхаванне ўваходзіць у топ-3 кірункаў, якія, на думку беларусаў, трэба развіваць у маладзёжнай палітыцы, нараўне з падтрымкай маладых сем’яў і здаровым ладам жыцця. Само паняцце «патрыятызм» таксама набывае ўсё больш станоўчыя асацыяцыі. На першых месцах у апытаных такія вызначэнні, як «жыць і працаваць у краіне», «паважаць дзяржаўную сімволіку і гісторыю Беларусі» і «быць гатовымі ў складаную хвіліну абараніць сваю краіну».

Не абмінулі ўвагай і абмеркаванне бягучай геапалітычнай сітуацыі і яе ўплыву на светаўспрыманне падрастаючага пакалення. Эксперты прадставілі свае ацэнкі існых пагроз, звязаных з распаўсюджваннем радыкальных ідэалогій і спробамі перагляду гістарычных падзей. Акрамя гэтага, прэзентавалі дакладныя меры па ўзмацненні духоўна-маральных каштоўнасцяў і фарміравання ў моладзі крытычнага мыслення.

— Задача грамадзянскага і патрыятычнага выхавання была і застаецца актуальнай для сістэмы адукацыі, для дзяржавы і грамадства. Будучыня нашай краіны ў многім залежыць ад узроўню сфарміраванасці патрыятычных якасцяў нашай моладзі, — зазначыла начальнік цэнтра сацыяльнай, выхаваўчай і ідэалагічнай работы Акадэміі адукацыі Наталля Катовіч. — Патрыятычнае выхаванне — адзін з найважнейшых складнікаў выхавання, таму гэтаму ўдзяляецца вялікая ўвага і ў асноўных дакументах сістэмы адукацыі. У школах праводзяцца інфармацыйныя гадзіны, факультатывы і конкурсы.