Ва ўсіх раёнах горада з гэтай нагоды падрыхтаваліся: масавыя гулянні мясцовых жыхароў і гасцей працягваюцца з самай раніцы. Святочная праграма сёлета сапраўды разнастайная. Падрабязней пра яе — у матэрыяле карэспандэнта «Звязды».

Былі розныя старонкі ў гісторыі нашага горада

Стартавалі мерапрыемствы з урачыстай цырымоніі ўскладання кветак да абеліска «Мінск — горад-герой». У ёй узялі ўдзел Старшыня Савета Рэспублікі Нацыянальнага сходу Беларусі, упаўнаважаны прадстаўнік Прэзідэнта ў горадзе Мінску Наталля Качанава, старшыня Мінскага гарвыканкама Уладзімір Кухараў, старшыня Мінскага гарсавета Арцём Цуран, міністр унутраных спраў Іван Кубракоў. 

Старшыня Савета Рэспублікі Наталля Качанава адзначыла, што Мінск можна лічыць узорам народнага адзінства ў Беларусі: «Людзі, якія жывуць і працуюць тут, тыя прадпрыемствы, установы і грамадскія арганізацыі пераконваюць мяне ў гэтым. Былі розныя старонкі ў гісторыі нашага горада і нашай краіны, мы гэта памятаем. Мы сталі адзначаць Дзень народнага адзінства, таму што разумеем, што толькі ў адзінстве народа можна захаваць мір і спакой, а самае галоўнае — суверэнітэт і незалежнасць краіны».

Да знакавага для беларусаў месца прыйшлі прадстаўнікі Мінскага гарвыканкама, раённых адміністрацый, грамадскасці, прадпрыемстваў горада, сілавых ведамстваў, а таксама дэпутаты, госці з гарадоў-пабрацімаў, ветэраны, моладзь.

«У Дзень горада мы збіраемся каля стэлы „Мінск-горад-герой“, каля помніка тым людзям, якія сваім подзвігам на палях бітваў, у партызанскіх лясах, падполлі кавалі перамогу. А потым гэтыя ж людзі, прыйшоўшы з фронту, аднаўлялі наш горад, — адзначыў старшыня Мінгарсавета Арцём Цуран. — Сёння на вуліцах беларускай сталіцы — шчаслівыя твары гараджан. Самае галоўнае — гэта людзі, нашы мінчане. Напярэдадні Дня горада была вельмі вялікая колькасць ушанаванняў працаўнікоў, жыхароў горада, якія кожны дзень робяць горад лепшым», — сказаў ён, пажадаўшы мінчанам міру, дабра і здзяйснення ўсяго задуманага.

У ліку прадстаўнікоў замежных дэлегацый на цырымоніі прысутнічаў намеснік мэра горада Омска Алег Баланаў. Ён адзначыў канструктыўнае ўзаемадзеянне двух гарадоў — Мінска і Омска. 

«На працягу досыць працяглага перыяду часу ў нас выстройваюцца цёплыя ўзаемаадносіны. Мы назіраем, падглядваем і дзелімся вопытам з вашым горадам. Больш за ўсё, вядома ж, нас здзіўляе і пакарае вашы чысціня, добраўпарадкаванне, культура, дабрыня і гасціннасць. Амічы вельмі шануюць сяброўствам і ўзаемадзеяннем з горадам Мінскам. Нашы народы адзіныя. Мы ганарымся тым, што нашы гарады з’яўляюцца пабрацімамі», — сказаў ён.

Між тым, у Мінск прыбылі дэлегацыі і іншых расійскіх гарадоў, у прыватнасці, Новасібірска, Ніжняга Ноўгарада, Мурманска, Санкт-Пецярбурга.

Моцныя, смелыя, адважныя...

Насычаная праграма разгарнулася ў розных кропках горада. 

У прыватнасці, каля цэнтральнага ўваходу ў парк Перамогі прайшлі міжнародныя спаборніцтвы «Наймацнейшы пажарны-выратавальнік». 

Старшыня Мінскага гарвыканкама Уладзімір Кухараў, які ўзяў удзел у мерапрыемстве, адзначыў, што правядзенне мерапрыемстваў, звязаных са службай органаў і падраздзяленняў па надзвычайных сітуацыях, стала добрай традыцыяй: «Сёння вельмі прыемна бачыць тут сапраўды моцных, смелых, адважных людзей, якія кожны дзень, рызыкуючы сваім жыццём, абараняюць нашых грамадзян. Прафілактычная работа, якую вы праводзіце сярод насельніцтва, дарагога каштуе. Вы паказваеце маладому пакаленню, наколькі важна быць моцнымі, смелымі, спрытнымі, каб спраўляцца з усімі цяжкасцямі, якія ўзнікаюць у вашай службе».

Перанесціся ў старажытнасць? Лёгка!

У зялёнай зоне на скрыжаванні праспектаў Машэрава і Пераможцаў праходзіць Міжнародны фестываль гістарычнай рэканструкцыі «Мінск старажытны». Тут разбілі палявыя лагеры воіны розных эпох. І ўсе яны, безумоўна, звязаны з гісторыяй Беларусі і яе сталіцы. 

Гэты фестываль, па словах дэпутата Мінскага гарсавета Міхаіла Мілаванава, — адна з візітных картак святкавання Дня горада. «Упершыню фестываль у Дзень горада прайшоў у 1997 годзе, калі Мінск адзначаў 930-годдзе. Першапачаткова гэта быў асабліва рыцарскі фэст. Ён рос і развіваўся, пакуль не трансфармаваўся ў сучасны „Мінск старажытны“, які радуе мінчан і гасцей горада больш за 10 гадоў».

«Бацькавы дзеці» — каля Нацыянальнай бібліятэкі

Для ўдзелу ахвотныя афармлялі першы транспартны сродак дзетак у такіх намінацыях, як «Нацыянальны каларыт» (у нацыянальных традыцыях), «Тэхна-калыска» (у вобразе любога транспартнага сродку), «Спартыўная» (для спартсменаў і балельшчыкаў), «Калыска арыгінальнага жанру» (самыя крэатыўныя і незвычайныя рашэнні ў афармленні).

Добрая спартыўная традыцыя

Каля Палаца спорту мінчане і госці таксама змаглі наведаць святочны кірмаш і ўзяць удзел у спартыўна-масавым свяце «Алімпійскі дзень», які доўжыўся да 17:00.

«Наведваць такія лакацыі ў Дзень горада ўжо стала для мінчан добрай традыцыяй. Мінск — горад спартыўны, сотні тысяч людзей тут займаюцца рознымі відамі спорту. Фармат свята ідэальна падыходзіць для рэалізацыі сваіх магчымасцяў», — адзначыў старшыня Мінскага гарвыканкама Уладзімір Кухараў.

Мэр Мінска выказаў надзею, што ў гэты дзень маладыя людзі змогуць выбраць найбольш прыдатныя для сябе спартыўныя дысцыпліны і прысвецяць ім важную частку жыцця, тым самым захоўваючы сваё здароўе, а таксама ствараючы падмурак для вялікай спартыўнай будучыні ўсёй краіны.

Віцэ-прэзідэнт НАК Дзмітрый Даўгалёнак адзначыў: «Мінчан цяжка здзівіць, але дзякуючы ўдзелу ў фестывалі „Вытокі“ спартыўныя федэрацыі атрымалі неабходны вопыт у гэтым плане. Кожная пляцоўка абрасла новым цікавым абсталяваннем, якое асабліва падабаецца дзецям».

Зараз на тым жа месцы — каля Палаца спорту — праходзіць вялікі канцэрт «У рытме горада». Хэдлайнер — МОТ. Наведаць мерапрыемства могуць усе жадаючыя. 

Падрабязная праграма: 

• 19:30 — на сцэну выйдуць артысты трыб’ют-шоу «NE Руки Вверх» з добра знаёмымі хітамі

• 20:15 — выступленне драйвовай кавер-групы Iodo Band

• 21:30 — стартуе паўгадзінны сэт ад DJ Holdi

• 22:00 — хэдлайнер канцэрту МОТ

• 23:00-00:00 — святочны феерверк і завяршэнне святкавання пад выступленне дуэта Swanky Tunes

Яна ВАЛАСАЧ

Фота БелТА і Віктара ДРАЧОВА