Top.Mail.Ru

Як у Адэльску адзначылі «Свята млынароў»

У мінулую нядзелю, 15 лістапада, аграгарадок Адэльск Гродзенскага раёна стракацеў народным каларытам і водарам свежага хлеба. Тут у 14-ы раз прымалі брэндавае «Свята млынароў», прымеркаванае да дня святога Марціна — нябеснага заступніка ўсіх млынароў.


Тое, што пачыналася чатырнаццаць гадоў таму як душэўная раённая ініцыятыва, сёння ператварылася ў маштабны абласны фестываль. Сёлета ў Адэльск з’ехаліся 13 найлепшых млынароў і 24 умелыя каравайніцы з усіх куткоў Гродзеншчыны. Свята зарадзілася тут невыпадкова: спрадвеку адэльская зямля славілася сваімі млынарамі, а на тэрыторыі населенага пункта калісьці працавалі ажно 14 млыноў.



Свята адкрылася маляўнічым тэатралізаваным шэсцем. Па цэнтральнай вуліцы пад апладысменты гледачоў прайшлі галоўныя героі дня — млынары ў традыцыйных уборах, гаспадыні з пышнымі, упрыгожанымі ручнікамі караваямі і фальклорныя калектывы. Здавалася, сама гісторыя ажыла на вуліцах старажытнага мястэчка. Сёлета пашанцавала з надвор’ем, і ўся пышнасць свята купалася ў сонечных промнях, ад чаго бакі ў караваяў здаваліся яшчэ больш румянымі.



Галоўнай інтрыгай дня стаў абласны конкурс «Найлепшы млынар Гродзеншчыны». На сцэне і спецыяльных пляцоўках разгарнулася гарачая барацьба: удзельнікам трэба было даказаць сваё веданне старажытных сакрэтаў мукамольнай справы, праявіць кемлівасць, спрыт і пачуццё гумару. Гледачы з азартам падтрымлівалі майстроў, якія з лёгкасцю ўпраўляліся з важкімі жорнамі і сыпалі народнымі прымаўкамі.



Не менш увагі сабрала і выстава-конкурс караваяў. Сталы гнуліся ад кулінарных шэдэўраў, многія з якіх унесены ў Дзяржаўны спіс гісторыка-культурных каштоўнасцяў Беларусі. У кожнай гаспадыні — свой сакрэт і свая сямейная гісторыя. Напрыклад, каля падворка Бераставіцкага раёна выстраілася сапраўдная чарга: мясцовыя майстрыхі частавалі гасцей старадаўняй вясельнай выпечкай — «гузкамі». Іх пяклі прыкладна за тыдзень да самой урачыстасці, а нявеста частавала імі ўсіх. Цеста тут нескладанае, а форма гатовага вырабу можа быць рознай. Госці з Бераставіцкага раёна прывезлі з сабой ружы.



Апроч гастранамічных адкрыццяў, гасцей чакала насычаная культурная праграма: працавалі рамесныя рады, тэматычныя міні-музеі, дзе можна было ў дэталях пазнаёміцца з побытам продкаў, а для моладзі сёлета ўпершыню адкрылася інтэрактыўная арт-пляцоўка БРСМ.

Як падкрэсліла намеснік начальніка ўпраўлення культуры Гродзенскага аблвыканкама Сняжана Куратчык, свята ўдалося! Яна выказала надзею, што новаўвядзенні гэтага года дапамогуць прыцягнуць яшчэ больш маладзёжнай увагі да свята. І гэта рэальная мэта, бо калісьці невялікае лакальнае мерапрыемства вырасла да абласнога ўзроўню.

Разыходзіцца ніхто не спяшаўся: да самага вечара ў Адэльску гучала музыка, вадзілі карагоды і дзяліліся рэцэптамі. 14-е «Свята млынароў» чарговы раз даказала, што пакуль жывыя традыцыі і павага да нялёгкай працы хлебароба і млынара, на беларускім стале заўсёды будзе свежы, духмяны каравай.

Вераніка КАЗЛОЎСКАЯ

Фота БелТА

arrow
Нашы выданні

Толькі самае цікавае — па-беларуску!

Напішыце ў рэдакцыю