Паркоўка пад знакам можа абысціся дорага. Эвакуацыя аўтамабіля падаражэла ў два разы.

Як адзначыў намеснік начальніка УДАІ ГУУС Мінгарвыканкама Дзяніс Лівановіч, прыняцце рашэння аб прымусовай адбуксіроўцы залежыць ад фактычнай аператыўнай абстаноўкі і абумоўлена неабходнасцю падтрымання прапускной здольнасці дарожнай сеткі, а таксама ўстаранення пагроз бяспекі ўдзельнікаў дарожнага руху. З-за няправільна прыпаркаваных аўтамабіляў адбываецца больш ДТЗ, чым здаецца. Да таго ж пакінутае каля пад’езда аўто перашкаджае праезду машын хуткай дапамогі, пажарнай тэхнікі.

«Супрацоўнікі ДАІ інфармуюць уласнікаў транспартных сродкаў аб факце ажыццяўлення эвакуацыі, паведамляючы аб месцы знаходжання аўтамабіля і ўчыненні адміністрацыйнага правапарушэння», — растлумачыў Дзяніс Лівановіч.

Эвакуіраваць машыну могуць, калі вадзіцель п’яны або адмовіўся прайсці медагляд, калі стаў на месца для інвалідаў без адпаведнай таблічкі за шклом, калі вырашыў прыпаркавацца каля электрычнай зарадкі.

Намеснік генеральнага дырэктара прадпрыемства «Гаррамаўтадар Мінгарвыканкама» Арцём Ганчар расказаў, што тарыф на эвакуацыю складае 200 рублёў. Таксама дадаткова аплачваецца 16 рублёў за суткі на захоўванне аўтамабіля на пляцоўцы. Калі адбываецца эвакуацыя без перамяшчэння ў месцы захоўвання, тады тарыф складае 120 рублёў.

Генеральны дырэктар дзяржаўнага прадпрыемства «Гаражы, аўтастаянкі і паркоўкі» Андрэй Зыранаў дадаў, што ў тарыф закладзены затраты на зарплату работнікаў, амартызацыю транспартных сродкаў, рамонт, утрыманне аўтастаянкі. Апошні раз тарыфы карэкціравалі больш за год таму.

Расце колькасць платных парковак на сталічных вуліцах. У аўтаўладальнікаў ёсць выбар — або плаціць за легальнае машына-месца, або рызыкаваць зарабіць штраф.