Напярэдадні Дня Незалежнасці ў некаторых раёнах адбудуцца важныя мерапрыемствы. У Браслаўскай цэнтральнай раённай бальніцы (ЦРБ) 2 ліпеня адкрыюць мамаграфічны кабінет. У галоўным упраўленні па ахове здароўя расказалі, што мадэрнізацыю ў ЦРБ правялі за кошт абласнога і раённага бюджэтаў. Сучасны лічбавы апарат дапаможа ранняй дыягностыцы новаўтварэнняў малочнай залозы, выяўленні анказахворванняў яшчэ да з’яўлення клінічных сімптомаў. Рэнтгенаўскі мамограф дазволіць атрымліваць лічбавы малюнак высокай якасці пры нізкай дозавай нагрузцы. Новы кабінет будзе даступны для жанчын як Браслаўскага, так і найбліжэйшых раёнаў. Раней жыхаркам Браслаўшчыны даводзілася ездзіць для падобных даследаванняў у Полацак, а зараз мамаграфія з’явіцца ў крокавай даступнасці.

2 ліпеня таксама будуць адкрыты два новыя аб’екты ў Расонах — пляцоўка для варкаўту і аддзяленне сястрынскага догляду ў ЦРБ. У Глыбокім адбудзецца вернісаж выстаўкі маляванкі ў цэнтры традыцыйнай культуры і народнай творчасці. Гарадок стане месцам правядзення спартыўна-масавага турніру «Кубак Дружбы», у якім прымуць удзел мясцовая і каманда з Калінінграда, і спаборніцтвы для моладзі «Падцягніся за Беларусь». У Полацку на галоўнай сцэне на цэнтральнай плошчы пройдзе маладзёжны канцэрт «Рок над Дзвіной».

Ва ўсіх раёнах вобласці 3 ліпеня ля мемарыяльных комплексаў, воінскіх пахаванняў будуць арганізаваны мітынгі ў гонар Дня Незалежнасці і 81-й гадавіны вызвалення Беларусі ад нямецка-фашысцкіх захопнікаў. Прадстаўнікі мясцовай улады, грамадскасць, ветэраны і школьнікі ўскладуць вянкі і кветкі да знакавых месцаў, якія ўвасабляюць мужнасць і стойкасць нашага народа, які выстаяў у гады Вялікай Айчыннай вайны, адрадзіў краіну з попелу і зрабіў яе моцнай суверэннай дзяржавай.

Па традыцыі на асноўных пляцоўках у абласным і раённым цэнтрах адбудуцца святочныя канцэрты, якія могуць паглядзець усе ахвотныя. Для дзяцей і дарослых ладзяць інтэрактыўныя пляцоўкі, выставы, у тым ліку ваеннай тэхнікі і прадукцыі прадпрыемстваў. Рэгіён далучыцца да рэспубліканскай акцыі «Спаём гімн разам», пасля якой жыхары ўбачаць маляўнічы салют.

Таксама 3 ліпеня ў некаторых гарадах і раёнах запланаваны мерапрыемствы, якія прыцягнуць увагу не толькі мясцовых жыхароў, але і гасцей з іншых краін. У Наваполацку ў мікрараёне Баравуха з ушанаваннямі перапахаваюць астанкі лётчыка — малодшага сяржанта Сімана Асадчава, які загінуў у 1941 годзе ў паветраным баі.

У Лепелі ў святочны дзень правядуць цікавыя актыўнасці і для дзяцей, і для моладзі. Школьнікаў запросяць узяць удзел у конкурсе малюнкаў на асфальце «Мая Радзiма — Беларусь». Хлопчыкам і дзяўчынкам прапануюць адлюстраваць усё, з чым асацыюецца ў іх краіна і родны лепельскі край. Таксама ў райцэнтры адбудзецца «Дранік-фэст», дзе будуць спаборнічаць дзве каманды з ліку моладзі, якая працуе. 

Выступленні кавер-бэндаў і творчых калектываў, тэматычныя пляцоўкі сельсаветаў «Франтавы прывал», палявая кухня, выстава вырабаў народных майстроў, арамапляцоўка і выязны гандаль чакаюць у Дзень Незалежнасці жыхароў і гасцей Сянно.

Фота з адкрытых крыніц