Актывісты БМААСП ва ўсіх раёнах Прынёмання выйшлі на вуліцы і ў двары. Снег ляцеў у бакі, тратуары ачышчаліся, а да дамоў пенсіянераў з’яўляліся бяспечныя праходы. Так, у Смаргоні працоўны дэсант расчысціў пешаходныя дарожкі і праезную частку, праход да калодзежа, а таксама дваровую тэрыторыю 82-гадовай пенсіянерцы, былой непаўналетняй вязніцы канцлагера.

Шчучынскія ратавальнікі сумесна з актывістамі БМААСП адправіліся на дапамогу адзінокім пажылым жыхарам раённага цэнтра. Працоўны дэсант вызваліў ад снежных заносаў двары і прылеглую тэрыторыю. Гаспадары былі вельмі ўдзячныя за дапамогу, а моладзь адзначыла: «Калі мы ўсе разам, любая праца спорыцца, а галоўнае — бачыш, як людзям становіцца лягчэй, а словы падзякі дарагога вартыя».

У Астравецкім раёне юныя ратавальнікі прыйшлі на дапамогу 76-гадовай жыхарцы в. Белькішкі. У сілу ўзросту і здароўя ёй не пад сілу было расчысціць снег самастойна. Бабуля звярнулася да ратавальнікаў, якія неадкладна прыйшлі на дапамогу.

Дабро не ведае межаў. Гэтую ісціну пацвярджаюць і работнікі МНС і іх памочнікі, юныя ратавальнікі з Навагрудскага дзяржаўнага каледжа тэхналогій і бяспекі. Іх валанцёрскі атрад у непагадзь накіраваўся да адзінока пражываючых грамадзян і інвалідаў, якія не могуць самастойна справіцца з наступствамі стыхіі. Хлопцы і дзяўчаты дапамаглі расчысціць ад снежных заносаў двары дзвюх жанчын.

Мяцеліца не замінала дружнай працы, а самі валанцёры прызналіся, што праца ім ані не ў цяжар.

У Гродне работнікі МНС сумесна з выхаванцамі ваенна-патрыятычнага клуба «Следапыт» далучыліся да расчысткі снегу і дапамаглі тым, хто асабліва мае патрэбу ў падтрымцы. У год беларускай жанчыны ратавальнікі і юныя патрыёты надалі ўвагу жанчынам, ветэранам працы, якія на працягу больш за 30 гадоў аддавалі сілу і душу любімай справе, унеслі свой уклад у развіццё і станаўленне сацыякультурнай і прамысловай дзейнасці абласнога цэнтра. Гаспадыні домаўладанняў выказалі падзяку за аказаную ім дапамогу.

Як падкрэслілі ў абласным упраўленні МНС, вынік праведзенай работы вымяраўся не кубаметрамі прыбранага снегу, а шчаслівымі ўсмешкамі і словамі падзякі. Для пажылых людзей такая дапамога - доказ таго, што яны не забытыя, а для моладзі — усведамленне, як проста дапамагчы бліжняму.