Па словах афіцыйнага прадстаўніка УСК па Брэсцкай вобласці Рамана Зармаева, у сацыяльнай сетцы Instagram 45-гадовы жыхар Баранавічаў пазнаёміўся з дзяўчынай, якая падчас размовы прапанавала яму «дадатковы заробак».

Новая сяброўка пераканала пацярпелага, што ў яе ёсць сябры на адной з гандлёвых біржаў, здольныя дапамагчы хутка і без рызыкі павялічыць капітал. Зацікавіўшыся прапановай, мужчына пагадзіўся, і неўзабаве з ім звязаліся «менеджары», якія сталі курыраваць яго дзеянні.

Зламыснікі давалі рэквізіты рахункаў для пералічэння сродкаў. Пры гэтым у створаным для ахвяры асабістым кабінеце платформы адлюстроўваўся несапраўдны буйны даход. Вядома, жахар Баранавічаў не здагадваўся аб гэтым. Гэта ўмацоўвала давер да аферыстаў, і мужчына працягваў пераводзіць грошы.

Праз некаторы час ён паспрабаваў вывесці «заробленыя сродкі», але пад надуманымі падставамі куратары яму адмаўлялі.

Усвядоміўшы нарэшце, што стаў ахвярай кібермахляроў, мужчына звярнуўся ў міліцыю. Усяго на рахункі зламыснікаў ён перавёў больш за 580 тысяч рублёў.

Зараз Баранавіцкім міжраённым аддзелам Следчага камітэта заведзена крымінальная справа па ч. 4 арт. 209 (махлярства, учыненае ў асабліва буйным памеры) Крымінальнага кодэкса Рэспублікі Беларусь.

Праводзяцца следчыя дзеянні і аператыўна-вышуковыя мерапрыемствы, накіраваныя на ўстанаўленне асоб, якія маюць дачыненне да ўчынення злачынства, а таксама на кампенсацыю прычыненага ўрону. Расследаванне крымінальнай справы працягваецца.

Прадстаўнік Следчага камітэта нагадаў, што трэба крытычна ставіцца да любой рэкламы ў сетцы Інтэрнэт, асабліва, калі там прапануюць за кароткі час атрымаць добры прыбытак.
Любая прапанова «гарантаванага», «лёгкага» ці «вялікага» заробку — нагода ўсумніцца.

Прафесійныя фінансавыя кампаніі не заключаюць здзелкі праз месенджары.

Калі вас падштурхоўваюць да тэрміновага пераводу буйной сумы пад маркай «унікальнай магчымасці», задумайцеся, не прымайце паспешных рашэнняў.