Жыхары сталічнага дома па адрасе: Шпілеўскага, 52, у Ленінскім раёне, даказалі: пры жаданні і дзяржаўнай падтрымцы можна ператварыць двор у зону актыўнага адпачынку. Тут адкрыўся сучасны варкаўт-комплекс для вулічных трэніровак. А ўсё пачалося са звычайнай размовы з памочнікам дэпутата. Мы пагутарылі з галоўнай натхняльніцай праекта, жыхаркай дома Аксанай КРУК, і даведаліся, як пераўвасобіць звычайную ідэю ў рэальны спартыўны аб’ект.

На сходзе таварыства ўласнікаў памочнік дэпутата Марына Васільеўна расказала пра Палажэнне «Аб парадку рэалізацыі грамадзянскіх ініцыятыў у горадзе». Яна патлумачыла, што жыхары могуць падаць заяўку ў Мінгарсавет і атрымаць фінансаванне з гарадскога бюджэту на карысныя для двара справы.

Чым жыве двор, дзе 70 працэнтаў жыхароў — шматдзетныя сем’і?

У доме № 52 па вуліцы Шпілеўскага — 248 кватэр. Семдзесят працэнтаў жыхароў — шматдзетныя сем’і. Для маленькіх дзяцей у двары былі гульнявыя комплексы, а вось для падлеткаў — нічога. Гэта турбавала актывістку Аксану Крук, якая вырашыла, што трэба мяняць сітуацыю.

«Захацелася стварыць умовы для актыўнага адпачынку дзяцей старэйшага ўзросту, — расказвае ініцыятарка. — Каб падлеткі больш займаліся спортам, вялі здаровы лад жыцця, адцягнуліся ад камп’ютараў. Гэта ж не проста пра гульні — гэта пра здаровую сям’ю, пра яе дабрабыт».

Ад задумы — да дакументаў

Працэдура аказалася не такой складанай, як чакалі. Жыхары пайшлі на прыём да дэпутата Мінгарсавета Святланы Кажэкінай, дзе заявілі аб сваім намеры. Сабралі поўны пакет дакументаў: праект з тлумачальнай запіскай, заяву ў Мінгарсавет, заяўку для ўдзелу ў конкурсе, каштарыс і — самае галоўнае — гарантыйны ліст аб гатоўнасці аплаціць 10 % ад кошту праекта.

Праект разгледзелі на сходзе савета тэрытарыяльнага грамадскага самакіравання акругі, дзе яго аднагалосна ўхвалілі.

— Рэалізацыя грамадзянскіх ініцыятыў на вуліцах Шпілеўскага і Сямёнава — яскравы прыклад таго, як сумесныя намаганні пераўтвараюць нашы двары. Новыя пляцоўкі для варкаўту ўжо сталі цэнтрамі прыцягнення, што пацвярджае высокі попыт на такія праекты.

Сёння механізмы падтрымкі народных ініцыятыў дэманструюць максімальную эфектыўнасць. Грамадзяне самі вызначаюць прыярытэты развіцця сваіх тэрыторый, а дэпутацкі корпус забяспечвае адміністрацыйную і фінансавую падтрымку гэтых ідэй. Актыўнасць жыхароў з’яўляецца галоўным рухавіком пазітыўных змен у акрузе. Мы абавязкова працягнем гэтую практыку і ў будучыні, — расказала дэпутат Маякоўскай выбарчай акругі № 12 Святлана КАЖЭКІНА.

Уласны ўнёсак — важны крок да агульнай мэты

Галоўная перавага гэтай ініцыятывы — фінансавая падтрымка дзяржавы. Дзесяць працэнтаў ад каштарысу аплацілі самі жыхары, астатнія 90 % узяў на сябе гарадскі бюджэт. Прыемны сюрпрыз для ўсіх удзельнікаў агульнай справы — праектна-каштарыснай дакументацыі не спатрэбілася, бо ўстаноўка спартыўнага комплексу не патрабавала дадатковых узгадненняў.

Засяродзіліся на спорце — і не спыніліся

У чэрвені 2026 года ў двары ўрачыста адкрылі новы спартыўны комплекс для заняткаў варкаўтам. Падлеткі першымі апрабавалі новыя снарады — радасці жыхароў не было мяжы.

Але на гэтым актыўныя жыхары не супакоіліся. Натхнёныя поспехам, яны падалі новую заяўку — ужо на ўстаноўку вулічных трэнажораў. Здароўе і дабрабыт у гэтым двары сапраўды на першым месцы.

— Дзякуючы гэтай ініцыятыве наш двор стаў сапраўдным месцам сілы, — дзеліцца Аксана Крук, шматдзетная мама і ініцыятарка праекта. — Адкрыццё спартыўнага комплексу стала святам для ўсіх. І галоўнае — дзеці цяпер не сядзяць у гаджэтах, а праводзяць час на свежым паветры, — гаворыць Аксана Генадзьеўна.

Жанчына адзначае, што падобныя праекты могуць быць рэалізаваны ў любым раёне горада, калі ёсць актыўныя людзі і жаданне змяняць сваё асяроддзе.

Шчырая падзяка тым, хто дапамог

Аўтар ініцыятывы ад імя жыхароў дома 52 па вуліцы Шпілеўскага выказала шчырую ўдзячнасць Мінскаму гарадскому Савету дэпутатаў, дэпутату акругі Святлане Генадзьеўне Кажэкінай і адміністрацыі Ленінскага раёна за магчымасць рэалізаваць грамадзянскую ініцыятыву і палепшыць жыццё людзей.

Надзея ЗУЕВА
Фота Ксеніі ЛІННІК