Напярэдадні новага 2026/2027 навучальнага года ў Мінску стартавала серыя семінараў-нарад па ключавых кірунках работы школ і дзіцячых садкоў. Пасяджэнне секцыі «Дапрызыўная падрыхтоўка навучэнцаў» праводзіцца на базе вайсковай часці 5448 унутраных войскаў Міністэрства ўнутраных спраў Беларусі. 

Як падкрэсліў намеснік кіраўніка ведамства, у новым навучальным годзе сістэма школьнай адукацыі працягвае развівацца ў адпаведнасці з задачамі, пастаўленымі кіраўніком дзяржавы.

«Ніякіх карэнных змен у новым навучальным годзе не плануецца. На апошнім педагагічным савеце Прэзідэнт паставіў дакладную задачу: мы займаемся паслядоўным удасканаленнем адукацыі. Гаворка ідзе аб тэхнічнай карэкціроўцы навучальных планаў і праграм. Новых прадметаў не дадаецца, пераразмеркавання дысцыплін па класах няма.

Галоўная мэта сённяшніх дыялогавых пляцовак — абмеркаваць са спецыялістамі на месцах кропкавыя моманты, якія патрабуюць увагі перад першым верасня», — растлумачыў Аляксандр Кадлубай.
Асобны акцэнт намеснік міністра зрабіў на змесце прадмета «Дапрызыўная і медыцынская падрыхтоўка». У вучэбную праграму дзясятых класаў унесены своечасовыя і практыка-арыентаваныя змяненні.

«Мы ўзмацнілі практычны складнік. Для дзесяцікласнікаў-юнакоў у праграму ўключаны 10-гадзінны курс па вывучэнні і навыках кіравання беспілотнымі лятальнымі апаратамі (БПЛА). У дзяўчат істотна пашыраны практычны блок па медыцынскай падрыхтоўцы — укаранёны элементы тактычнай медыцыны. Змянілі баланс у бок практычных заняткаў і павялічылі іх аб’ём. Мы адышлі ад чыстай тэорыі да канкрэтных навыкаў, неабходных у рэальных умовах», — расказаў намеснік міністра.

Аляксандр Кадлубай высока ацаніў вопыт правядзення 10-дзённых вучэбна-палявых збораў для дзесяцікласнікаў, якія сёлета ўпершыню прайшлі ў абноўленым выязным фармаце на базах вайсковых часцей і аздараўленчых устаноў. 

«Мы атрымалі выключна станоўчыя водгукі ад саміх юнакоў і калег з сілавога блока МУС, Дзяржаўнага пагранічнага камітэта, Міністэрства па надзвычайных сітуацыях і Міністэрства абароны. Асабліва ад тых хлопцаў, якія праходзілі вучэбна-палявыя зборы ў выязным фармаце, а не ва ўстановах адукацыі. Бо такі фармат забяспечвае максімальнае засваенне практычных навыкаў і дапамагае згуртаванню калектыву. Узаемадзеянне з вайсковай часцю 5448 — адзін з лепшых прыкладаў у краіне, і нашу задачу мы бачым у тым, каб максімальна маштабаваць гэты вопыт на ўсю Беларусь», — падкрэсліў прадстаўнік Мінадукацыі.

Паводле яго слоў, паралельна ў сталіцы працуюць пляцоўкі па пытаннях якасці адукацыі, школьнага выхавання, прафілактыкі дэвіянтных паводзін і выяўлення сямейнага недабрабыту.

Не засталася без увагі і сістэма дашкольнай адукацыі. Аляксандр Кадлубай адзначыў рост запатрабаванасці ясельных груп для дзяцей ва ўзросце ад 2 да 3 гадоў.

«У краіне сёння паспяхова функцыянуе больш за 500 такіх груп. Мы бачым запыт ад маладых мам, якія хочуць раней выйсці на працу, і стараемся даць такую магчымасць у кожным раёне. Асобна абмяркоўваюцца методыка работы з дзецьмі ранняга ўзросту, пытанні забеспячэння іх бяспекі і кваліфікацыі педагогаў. Акрамя таго, перад кіраўнікамі дзіцячых садкоў пастаўлена задача загадзя адпрацоўваць з бацькамі пытанні камплектавання груп, каб выключыць сітуацыі, калі дзіця не трапляе ў жаданую ўстанову», — звярнуў увагу прадстаўнік ведамства.

Работа секцый з удзелам спецыялістаў прадоўжыцца. Вынікі экспертных абмеркаванняў будуць прадстаўлены на маштабным пленарным семінары-нарадзе пад кіраўніцтвам міністра адукацыі, дзе агучаць выніковы пратакол даручэнняў на новы 2026/2027 навучальны год.