У парадак дня мерапрыемства ўключаны разгляд прававога акта, які датычыцца выплаты дапамог па доглядзе дзяцей. 

Кіраўнік дзяржавы падкрэсліў, што ў Беларусі бацькам аказваецца вельмі адчувальная матэрыяльная падтрымка. Ёсць аднаразовыя выплаты пры нараджэнні дзіцяці (каля 5 тыс. рублёў на першага і больш за 7 тыс. рублёў — на другога і наступных дзяцей). Існуе сямейны капітал для шматдзетных — больш за 35 тыс. рублёў у цяперашні час. А таксама штомесячныя дапамогі — мінімум 1 тыс. рублёў. 

«Здавалася б, нараджайце! На поўным дзяржаўным забеспячэнні дзеці. Але сучасны свет стаў занадта прагматычным. Маладыя людзі спачатку імкнуцца вырашыць іншыя пытанні — адукацыя, кар’ера, яшчэ чагосьці, а потым ужо нараджаць», — сказаў Прэзідэнт.

Аляксандр Лукашэнка звярнуў увагу, што ўсяго 10 гадоў таму ўзровень дабрабыту беларусаў быў у два разы ніжэйшы за сённяшні: ВУП на душу насельніцтва ў 2015 годзе — каля $18 тыс., у 2025 годзе — прыкладна $35 тыс. «Але дзетак нараджалася ў два разы больш тады, калі мы былі бяднейшымі (у 2015 годзе — амаль 120 тыс., у 2025 годзе — 55 тыс.)», — заўважыў кіраўнік дзяржавы.

«Каб мы не зніклі як нацыя і было каму працаваць, усё проста, як двойчы два: двое бацькоў — двое дзетак. Гэта база, як кажа моладзь. А лепш — трое і больш, — падкрэсліў Прэзідэнт. — Таму на дзяржаўным узроўні трэба знайсці дзейсную формулу, якая, па-першае, ажывіць дэмаграфічныя працэсы. Па-другое, стане матывацыяй да ўсвядомленага мацярынства і бацькоўства, зробіць іх модным трэндам. Тады мы захаваем і прымножым сваё насельніцтва».

Для вырашэння дэмаграфічных задач урад прапанаваў кардынальна перагледзець меры дзяржаўнай падтрымкі сем’яў з дзецьмі. Прэзідэнт, перш чым прыйсці да канкрэтных рашэнняў у гэтай сферы, акрэсліў шэраг прынцыповых пытанняў. 

«Ці ёсць гарантыя, што пашырэнне фінансавых стымулаў сапраўды надасць імпульс нараджальнасці?» — удакладніў Аляксандр Лукашэнка. Кіраўнік дзяржавы спытаў таксама пра сусветны досвед, доўгатэрміновы эфект (на пяць і больш гадоў) ад магутнай дзяржпадтрымкі і ўплыў на бюджэт, эканоміку краіны.