Алег Раманаў: «У пяцігодку якасці вельмі важна павышаць узровень кампетэнцыі нашых спецыялістаў»

«Якасць — гэта залог нашага выжывання», — адзначыў дэпутат Палаты прадстаўнікоў, старшыня РГА «Белая Русь», старшыня Беларускай партыі «Белая Русь» Алег Раманаў. «Канкурэнцыя на знешніх рынках становіцца ўсё больш жорсткай, і для таго каб упэўнена займаць на іх свае нішы і паспяхова асвойваць новыя рынкі, беларусам трэба быць канкурэнтаздольнымі. А за кошт чаго? За кошт высокай якасці прадукцыі. Калі яна будзе, тады нашы прадпрыемствы могуць працаваць нармальна, загружаць свае магутнасці, даваць супрацоўнікам дастойную заработную плату — усё, што трэба чалавеку і дзяржаве», — назваў ён першую прычыну, па якой правядзенне пяцігодкі якасці неабходна менавіта цяпер.

Другая прычына, на думку Алега Раманава, у тым, што Беларусь ужо дасягнула годнага ўзроўню жыцця, які задавальняе патрэбнасці людзей. Але ёсць не толькі ўзровень жыцця, ёсць якасць жыцця. «Якасць жыцця звязана з узроўнем адукацыі, медыцыны, сацыяльных праграм. Якасць жыцця — гэта экалогія, бяспека, дзяржаўнае кіраванне. І для таго каб нашы людзі жылі дастойна, трэба павышаць якасць работы ва ўсіх сферах жыццядзейнасці грамадства. У пяцігодку якасці вельмі важна павышаць узровень кампетэнцыі нашых спецыялістаў. Сёння трэба асвойваць новыя тэхналогіі, новыя віды тэхнікі і вытворчасцяў і тым самым выходзіць на больш высокі ўзровень прамысловага, тэхналагічнага развіцця краіны», — падкрэсліў Алег Раманаў. Ён заявіў, што партыя і грамадскае аб’яднанне «Белая Русь» будуць рэалізоўваць новыя праекты, звязаныя з добраўпарадкаваннем у розных населеных пунктах краіны. «Белая Русь» не застанецца ў баку ад той маштабнай работы па добраўпарадкаванні краіны, якая праводзіцца цяпер і будзе праводзіцца надалей«, — запэўніў Алег Раманаў.

Ірына Даўгала: «Асвоім якасць — здабудзем і колькасць»

Ірына Даўгала, намеснік старшыні Пастаяннай камісіі Палаты прадстаўнікоў па правах чалавека, нацыянальных адносінах і сродках масавай інфармацыі мяркуе:

— Недастаткова толькі выканаць работу — яе трэба выканаць якасна. Менавіта такі пасыл ідзе ад нашага Прэзідэнта больш за тры дзесяцігоддзі суверэнітэту Беларусі. Усе гэтыя гады наш лідар імкнуўся да таго, каб не проста насыціць таварамі і паслугамі ў першую чаргу ўнутраны рынак (а тады, у 1990-я, гэта было жыццёва неабходна), але і прасоўваць беларускую прадукцыю на знешніх рынках. Аднак гэта магчыма толькі пры ўмове выключна якаснай прадукцыі. Таму аб’яўленне Прэзідэнтам пяцігодкі якасці толькі яшчэ раз падкрэсліла стратэгічнае бачанне нашага лідара: якасць — гэта паказчык адказнасці Беларусі і яе імідж на міжнароднай арэне.

Асаблівым для нашай краіны стаў 2024 год, аб’яўлены кіраўніком дзяржавы Годам якасці. Прэзідэнт адразу адзначыў: «Хачу, каб вы разумелі: якасць — гэта не толькі пра эканоміку і вытворчасць. Гэта, перш за ўсё, пра чалавека». Вядома ж, не будзем хаваць, што Год якасці — гэта курс на мадэрнізацыю, тэхнічнае пераабсталяванне вытворчасцяў незалежна ад галіновай прыналежнасці і формы ўласнасці.

Вынікі не прымусілі сябе чакаць — якасць беларускай прадукцыі стала брэндам. Вытворчасць прадукцыі, якая не проста адпавядае попыту і чаканням самых капрызных спажыўцоў, але і дазваляе вытворцам быць упэўненымі ў заўтрашнім дні, стварае імідж і аўтарытэт, дае штуршок для далейшага развіцця.

Якасць прадукцыі — найлепшая гарантыя вернасці спажыўца. Гэта наймацнейшая абарона ад канкурэнцыі і адзіны шлях да ўстойлівага росту і прыбыткаў, а значыць, напаўнення дзяржаўнага бюджэту, у тым ліку для выканання дзяржавай сваіх сацыяльных гарантый для неабароненых пластоў насельніцтва.

Але чалавек быў і застаецца тым, дзеля каго патрэбна гэта самая якасная прадукцыя. У жыцці ўсё ўзаемазвязана. Якасць нашага жыцця традыцыйна звязваецца з узроўнем дабрабыту чалавека ці краіны ў цэлым, аднак сучасныя рэаліі ўсё часцей прымушаюць звяртацца да таго, што якасць неабходная ва ўсім.

Ад якасці работы нашага заканадаўства, а значыць, ад работы парламента, залежыць якасць нашага жыцця: як своечасова будуць прымацца тыя ці іншыя законапраекты, наколькі яны будуць якаснымі ў правапрымяняльнай практыцы і садзейнічаць прасоўванню нашай эканомікі і іншых сфер нашай жыццядзейнасці.

Для жыцця людзей, а гэта значыць, кожнага з нас, работы любой сферы неабходна ў першую чаргу бяспека. Якасная бяспека, бо ніхто з нас нават не задумваецца, як саміх сябе засцерагчы ад якіх-небудзь пагроз, для гэтага ў нас ёсць сілавы блок на чале з Галоўнакамандуючым. Гэта яны забяспечваюць усім нам, падкрэслю, якасную бяспеку.

Каб усе сферы працавалі як гадзіннік, патрэбны прафесійныя кадры, а значыць, якасная сістэма адукацыі. Мы ўсе жадаем быць здаровымі — патрэбна якасная сістэма аховы здароўя. Жадаем прасоўваць тэхналогіі — патрэбна якасная навука.

Словам, куды не кінеш позірк, усюды якасць выходзіць, як кажуць, на пярэдні план.

Так што нам не варта гнацца за колькасцю, а важна дабівацца якасці. Як толькі мы асвоім абсалютна ўсюды якасць, здабудзем і колькасць.
Таму пяцігодка якасці павінна стаць крэда жыцця кожнага беларуса.

Прэв’ю: БелТА