«Тэрыторыя перамог» у вёсцы Занкі

Праект пад назвай «Тэрыторыя перамог» быў рэалізаваны па ініцыятыве мясцовай жыхаркі — работніка культуры Таццяны ВЯРБІЦКАЙ. Да нядаўняга часу сквер у цэнтры вёскі быў месцам, дзе праводзіліся мітынгі. Але тэрыторыя была непрыстасаванай для адпачынку, і жыхары не мелі магчымасці бавіць там час з дзецьмі. Таццяна Мікалаеўна разам са старастам агучвала гэту праблему на сельскіх сходах і сустрэчах з насельніцтвам, расказала старшыня Свіслацкага сельскага выканаўчага камітэта Алена КАЛІНОЎСКАЯ:

— Каб зразумець, што канкрэтна хочуць бачыць жыхары ў скверы, праводзіліся апытанні. Сумесна з ініцыятарам жыхары абмяркоўвалі, якія зоны хацелі б бачыць на тэрыторыі сквера. На аснове пажаданняў жыхароў быў распрацаваны праект, які пасля перамог у конкурсе грамадзянскіх ініцыятыў.

У скверы былі добраўпарадкаваны чатыры зоны.

• Першая зона — гульнявая. Тут устаноўлены сучасныя комплексы. Гэта месца ідэальна падыходзіць для дзіцячых гульняў і актыўнага адпачынку. Дарослыя і падлеткі могуць пагуляць тут у футбол і валейбол.

• Другая зона — зона цішыні. У ёй размешчаны ўтульныя альтанкі, дзе можна пачытаць кнігу, выпіць гарбаты ці проста атрымаць асалоду ад прыроды.

• Трэцяя зона — інфармацыйная. Усталяваны стэнд з QR-кодам, на якім размешчана інфармацыя аб людзях, пахаваных тут. Гэта невялікі кавалачак гісторыі, які дапамагае захаваць памяць аб мінулым.

• Чацвёртая зона — імправізаваная сцэна. Тут размешчаны лаўкі, якія часта выкарыстоўваюцца для правядзення розных мерапрыемстваў. Гэта месца стала папулярным сярод жыхароў, асабліва ў дні свят.

— Без спонсарскай дапамогі і ўдзельнікаў суфінансавання рэалізаваць праект было б немагчыма. 

Праект яшчэ не завершаны. У планах — асвятліць тэрыторыю, каб зрабіць яе бяспечнай і камфортнай у цёмны час сутак. Для гэтага неабходна распрацаваць праект і атрымаць адпаведныя дазволы. Уладкаванне парка стала магчымым дзякуючы намаганням сельскага Савета, спонсараў, партнёраў і саміх жыхароў, якія актыўна ўдзельнічалі ў суботніках, дапамагалі ў азеляненні і добраўпарадкаванні тэрыторыі. Гэта месца стала зонай адпачынку і ўзаемадзеяння.

«Сквер маёй мары»

У гарадскім пасёлку Поразава таксама ёсць праект, рэалізаваны дзякуючы конкурсу грамадзянскіх ініцыятыў. Там уладкавалі «Сквер маёй мары». Гэта падзея стала для жыхароў пасёлка прыемным падарункам. Як расказаў старшыня Поразаўскага сельскага выканкама Віктар АКУДОВІЧ, Свіслацкі раён актыўна ўдзельнічае ў грамадзянскіх ініцыятывах, якія рэалізуюцца пад эгідай Гродзенскага абласнога Савета дэпутатаў і асацыяцыі мясцовых Саветаў дэпутатаў. Ён падкрэсліў, што паразаўчане заўсёды адгукаюцца на такія праекты.

Новы сквер стаў пляцоўкай для камфортнага адпачынку дзяцей і дарослых, а таксама для гасцей горада, якія наведваюць гістарычныя славутасці Поразава і яго наваколля. Ініцыятарам праекта «Сквер маёй мары» стала мясцовая жыхарка Валянціна БАТВІЧ, якая мае багаты вопыт работы з насельніцтвам дзякуючы шматгадовай дэпутацкай дзейнасці. Яна неаднаразова выбіралася дэпутатам Свіслацкага раённага Савета дэпутатаў і Поразаўскага сельскага Савета дэпутатаў, у цяперашні час з’яўляецца старастай гарадскога пасёлка Поразава. 

— Падтрымку праекту аказалі многія людзі і арганізацыі, размешчаныя на тэрыторыі сельскага Савета. Мы ўдзячныя раённаму Савету дэпутатаў і ўсім, хто ўдзельнічаў у суфінансаванні праекта. У новым скверы рэалізоўваюцца культурна-забаўляльныя і гульнявыя праграмы для жыхароў, гасцей пасёлка і турыстаў. У скверы ўстаноўлены дзве альтанкі, дзіцячая гульнявая пляцоўка, шэсць кованых лаў, чатыры урны для смецця, а таксама інфармацыйны стэнд з фатаграфіямі і апісаннем гістарычных аб’ектаў на тэрыторыі Поразаўскага сельсавета. Парк змяніўся і стаў дастойным месцам адпачынку для жыхароў і дзяцей.

Абодва паркі сталі месцам прыцягнення жыхароў населеных пунктаў. І што самае важнае, многія зрабілі ўнёсак у стварэнне гэтых аб’ектаў, імкнучыся палепшыць родныя мясціны.

Вераніка КАЗЛОЎСКАЯ
Фота аўтара і «Свіслацкай газеты»