Зламыснікі размяшчаюць аб’явы аб здачы жылля на папулярных сайтах, напаўняюць старонку фэйкавай інфармацыяй і чакаюць, калі чарговы кватэраздымшчык трапіцца на іх вудачку, тлумачыць праваахоўнік:

— У якасці прынады аферысты выкарыстоўваюць прыгожыя фатаграфіі з новенькім рамонтам кватэры, пры гэтым кошт такога жылля нашмат таннейшы, чым у іншых арэндадаўцаў, ды яшчэ і размяшчана яно, маўляў, у самым цэнтры: побач метро, прыпынак грамадскага транспарту, магазіны і г. д. Аднак не трэба губляць пільнасць, неабходна як мага лепш вывучыць такую прапанову.

Нядаўна, напрыклад, у Партызанскае РУУС звярнуліся двое пацярпелых, якія паддаліся на ўгаворы арэндадаўцаў і ў якасці гарантыі арэнды жылля пералічылі перадаплату. 20-гадовая дзяўчына пазбавілася ў выніку 300 рублёў, а 28-гадовы хлопец — 100 рублёў. Пасля атрымання сродкаў аферысты перасталі выходзіць на сувязь.

Яшчэ адзін выпадак: 30-гадовы грамадзянін суседняй краіны, які прыехаў у Мінск па працоўнай візе, зацікавіўся аналагічнай прапановай. Аднак яго насцярожыла патрабаванне перадаплаты ў памеры 300 рублёў. Мужчына своечасова звярнуўся ў міліцыю, дзякуючы чаму ўдалося пазбегнуць страты сродкаў. Узбуджаны крымінальныя справы.

Вадзім Грыб раіць звяртаць увагу на характэрныя прыкметы ашуканскіх схем: нізкі кошт арэнды, патрабаванне стопрацэнтнай перадаплаты ў сціслыя тэрміны, спроба перавесці зносіны ў месенджары, а таксама ціск з боку арэндадаўцы, які пераконвае, што на кватэру высокі попыт і тэрмінова неабходны аванс для браніравання, а то «кватэра пойдзе».

Каб не стаць ахвярай ашуканцаў, намеснік начальніка Партызанскага РУУС раіць патрабаваць ва ўласніка дакументы на жыллё, якое здаецца ў арэнду; сустракацца з уладальнікам асабіста пры аглядзе жылля; пераканацца, што чалавек сапраўды з’яўляецца гаспадаром нерухомасці; не ўносіць аванс без падпісанай дамовы арэнды. 

Калі вы сутыкнуліся з ашуканцамі, неадкладна паведаміце аб гэтым па тэлефоне 102.