22 студзеня ў МАРГ прайшоў семінар па продажы тавараў айчыннай вытворчасці з удзелам прадпрыемстваў канцэрна «Белдзяржхарчпрам», «Беллегпрам», арганізацый гандлю і іншых.

«Сабралі шырокую аўдыторыю вытворцаў, гандлёвых аператараў, каб падвесці вынікі работы за 2025 год і сфарміраваць шляхі для паляпшэння дасягнутых вынікаў. Нашы вытворцы прадставілі навінкі, якія, спадзяюся, будуць задавольваць спажывецкі попыт», — адзначыла Святлана Караткевіч, дадаўшы, што мерапрыемства накіравана на ўзаемадзеянне паміж суб’ектамі гаспадарання для ўзаемавыгаднага супрацоўніцтва. Гэта магчымасць вывучыць тэндэнцыі, трэнды, кірункі для фарміравання новых прапаноў і вызначыць тую прадукцыю, якая карыстаецца папулярнасцю ў пакупнікоў, каб прасоўваць яе праз гандлёвыя сеткі.

Для прасоўвання айчынных тавараў у снежні стартаваў праект Міністэрства антыманапольнага рэгулявання і гандлю Рэспублікі Беларусь «Кожная пятніца — роднае, сваё». «Акцыя накіравана ў першую чаргу на папулярызацыю беларускай прадукцыі, мовы, культуры. Напярэдадні Новага года ўбачылі рэакцыю нашых канцэрнаў і ведамстваў — і „Белдзяржхарчпрама“, і „Беллегпрама“, якія са сваімі прадпрыемствамі прапанавалі скідкі на вырабленыя тавары. Да акцыі далучаюцца і спартыўныя комплексы, і суб’екты, якія працуюць у сферы грамадскага харчавання. Гэта агульная ўключанасць у працэс паказвае, што мы любім сваю прадукцыю, сваю краіну і ўсё тое, што робім», — адзначыла Святлана Караткевіч.

Паводле яе слоў, любая краіна падтрымлівае сваіх вытворцаў. Напрыклад, у Расіі распрацаваны законапраект аб нацыянальнай паліцы. «Мы таксама не павінны адставаць ад гэтых трэндаў. Трэба ствараць перадумовы, каб наша якасная і запатрабаваная прадукцыя магла рэалізоўвацца ў дастатковай колькасці. І канцэпцыя нацыянальнай бяспекі ставіць сваімі асноўнымі задачамі рэалізацыю ў Беларусі не менш як 85 працэнтаў тавараў харчовай групы айчыннай вытворчасці. Да гэтага ідзём паступова», — расказала Святлана Караткевіч.

Яна звярнула ўвагу, што за апошнія два кварталы 2025 года запаволіўся спад рэалізацыі тавараў айчыннай вытворчасці. «Да 2030 года мы пастараемся дасягнуць тых паказчыкаў, якія нам ставіць урад і Прэзідэнт», — дадала Святлана Караткевіч.