Асобным і асаблівым блокам пытанняў у дакладзе старшыні аблвыканкама Прэзідэнту былі кадры — новыя старшыні ў раёнах, новы старшыня Гомельскага гарвыканкама. «Сапраўды, кіраўнік дзяржавы вельмі сур’ёзна засяродзіў увагу на рабоце з кадрамі. У першую чаргу (гаворка ішла. — Заўв. БелТА) аб старшыні Гомельскага гарвыканкама, старшынях Мазырскага і Петрыкаўскага райвыканкамаў. Прэзідэнту я далажыў аб асноўных рысах характару і падыходах кіраўнікоў, па якіх прынцыпах яны прызначаліся, аб тым, што фактычна яны ўжо ў страі і працуюць на выкананне тых задач, якія былі раней запланаваны, уносяць свае карэктывы. Работа ідзе зладжана», — падкрэсліў кіраўнік вобласці.

Паводле яго слоў, прызначаныя нядаўна кіраўнікі стаялі ў рэзерве, у рэестры кіраўніка дзяржавы. «Упэўнены, што мы з прапанаванымі Прэзідэнту кандыдатурамі не памыліліся. І мая задача і ў цэлым задача ўсіх — узмацніць зараз работу і даць новы імпульс развіццю гэтых раённых цэнтраў. У тым ліку ў рамках задач, якія пры наведванні рэгіёна паставіў Прэзідэнт. Канкрэтна па Петрыкаве — развіццё сацыяльнай часткі самога горада, інфраструктуры, развіццё сельскай гаспадаркі. Развіццё Мазыра па ўсіх напрамках. І Гомель павінен стаць яшчэ прыгажэйшым, і работа прамысловасці павінна прынесці сур’ёзныя вынікі», — сказаў старшыня аблвыканкама.

Іван Крупко расказаў Прэзідэнту і аб падыходах у рабоце з кадрамі ў Гомельскай вобласці. «Па ўсіх прызначэннях каля 80% ідуць з рэестра або з рэзерву кадраў аблвыканкама. У нас працуюць дзве добрыя школы. Ужо на працягу пяці гадоў — „Школа маладога кіраўніка“, якую вядзе камітэт па сельскай гаспадарцы аблвыканкама. За пяць гадоў выпусцілі каля сотні чалавек. Прыкладна 30% працуюць кіраўнікамі, астатнія прасоўваюцца па службовай лесвіцы. І гэта добры патэнцыял для далейшай работы кіраўніка», — перакананы Іван Крупко.

«Вельмі нядрэнна працуе і „Школа маладых прамыслоўцаў“ у сінергіі аблвыканкама і саюза наймальнікаў. З прагрэсіўных спецыялістаў рыхтуем таксама будучых кіраўнікоў. За пяць гадоў прайшлі ўжо навучанне каля 90 чалавек. Сёння яны працуюць і намеснікамі і кіраўнікамі прамысловых прадпрыемстваў. Думаю, работа ў такіх важных напрамках у „Школе маладога прамыслоўца“, як эканоміка, фінансы, штучны інтэлект, дасць магчымасць маладым талентам далей развіваць прамысловасць Гомельшчыны і іншыя сферы», — дадаў кіраўнік вобласці.

«А ў сельскай гаспадарцы на базе 30 гаспадарак (з вопытнымі настаўнікамі ўдзельнікі „Школы маладога кіраўніка“. — Заўв. БелТА) на працягу шасці месяцаў вывучаюць вопыт у раслінаводстве — ад пасяўной да ўборкі траў, збожжавых, у эканоміцы, бухгалтарскім уліку, жывёлагадоўлі», — растлумачыў ён.

«Мы не чакаем, што само вырасце новае пакаленне кіраўнікоў, а фарміруем на базе гэтых дзвюх школ кадры, якія будуць кіраваць прадпрыемствамі, кіраваць рэгіёнам у будучыні», — падсумаваў Іван Крупко.