Выступленні артыстаў суправаджаў Нацыянальны Прэзідэнцкі аркестр Рэспублікі Беларусь, і дзякуючы майстэрству музыкантаў выкананне было асабліва жывым, душэўным і лірычным.

У госці да фестывалю прыехалі многія зоркі эстрады з Беларусі і Расіі. Самыя тонкія струны душы гледачоў кранула выступленне музыкі ДыДзюЛі. Нягледзячы на тое, што канцэрт праходзіў ужо ў прыцемках, Іван Мальцаў і Лі Ён Сон нагадалі, што ўвесь фестываль азараў «Прамень сонца залатога». Так, былі дажджы, ліўні і навальніцы, але няўжо сапраўдных прыхільнікаў «Славянскага базару» гэта калісьці палохала?

Любімая спявачка і даўні сябар фестывалю Ларыса Доліна падарыла публіцы некалькі нумароў, у тым ліку з уладальніцай Гран-пры конкурсу выканаўцаў у 2022 годзе Ганнай Трубяцкой. Дарэчы, Ганна тады ў фінале выканала песню Ларысы Долінай «Сцяна», а зараз выйшла з вялікай артысткай на адну сцэну.

Расіянін Сяргей Любавін і беларуска Ганна Благава праспявалі пра «Грэшнае каханне», гурт Reflex нагадаў, што «Танцы» — гэта не толькі прыгожа, але і карысна для здароўя, а Вольга Бузава правяла першакласны «Гамбіт». Чароўны голас Пятра Ялфімава добра знаёмы кожнаму яго прыхільніку ў многіх краінах, але яго «Погляд кахання» заўсёды накіраваны ў бок роднай сінявокай Беларусі.

Член журы сёлетняга конкурсу маладых выканаўцаў «Віцебск» Аляксандр Панаётаў ведае, што «Карма» (а песню менавіта з такой назвай ён выканаў на сцэне) — рэч сур’ёзная і непрадказальная, а таму, каб яна на табе не адбілася, трэба быць добрым да людзей. І асабліва да ўдзельнікаў творчага спаборніцтва, ставіць ім добрыя адзнакі.

Старшыня журы гэтага ж конкурсу Таісія Павалій сваёй канцэртнай кампазіцыяй сказала зале Летняга амфітэатра — «Ты самы лепшы». 

Ніхто не змог уседзець на месцы, калі Алег Газманаў выйшаў са сваімі хітамі «Есаўл», «Азёры сінія», «Ясныя дні». Гледачы спявалі, танчылі і весяліліся на поўную.

Удзельнікі канцэрта ўсе разам развіталіся са «Славянскім базарам» да наступнага года, праспяваючы «Да пабачэння, фестываль!».