«Галоўная задача для кіраўніцтва раёна»

На пасяджэнні Докшыцкага райвыканкама абмяркоўвалі тэму сацыяльна-эканамічнага развіцця. Старшыня Палаты прадстаўнікоў падчас пасяджэння пасля справаздач адказных асоб ініцыяваў абмеркаванне іншых актуальных для раёна і ўсёй краіны тэм: жыллёвае будаўніцтва, замацаванне маладых кадраў на сяле, гандлёвае абслугоўванне насельніцтва, стан спраў у лясной гаспадарцы. Спікер Палаты прадстаўнікоў таксама папрасіў больш падрабязна далажыць аб стане спраў у сельскай гаспадарцы рэгіёна.

Па выніках абмеркавання Ігар Сергяенка адзначыў, што раён у цэлым мае станоўчую дынаміку развіцця ў справаздачным перыядзе. Выконваюцца 10 з 12 даведзеных паказчыкаў.

— Забяспечаны рост інвестыцый, бачная праца і ўвага кіраўніцтва раёна да развіцця турыстычнага патэнцыялу, нядрэнна развіваецца прадпрымальніцтва.

Разам з тым, падкрэсліў Старшыня Палаты прадстаўнікоў, ёсць шэраг наспяваючых праблем, якія могуць адбіцца на эканоміцы раёна ўжо заўтра. У іх ліку — зніжэнне аб’ёмаў прамысловай вытворчасці, нявыкананае даведзенае заданне па вытворчасці валавой прадукцыі ў сельскай гаспадарцы, рост пратэрмінаванай крэдыторскай запазычанасці і іншыя.

Ігар Сергяенка заклікаў удзяліць асаблівую ўвагу ААТ «Ветразь» як валаўтваральнаму прадпрыемству раёна:

— Гэта галоўная задача для кіраўніцтва раёна. У заключэнне Ігар Сергяенка адзначыў, што ў раёна ёсць не толькі сур’ёзны патэнцыял і імкненне развівацца, але і прафесійныя кадры для гэтага.

«Закон на выхадзе павінен быць рабочым»

Затым упаўнаважаны прадстаўнік кіраўніка дзяржавы ў Віцебскай вобласці сустрэўся з калектывам Докшыцкай цэнтральнай раённай бальніцы. Гаворка ішла аб заканадаўчай дзейнасці Палаты прадстаўнікоў, а таксама міжнароднай абстаноўцы. У рамках адзінага дня інфармавання спікер Палаты прадстаўнікоў асобна спыніўся на тэме «Трэнды і новыя кірункі развіцця турызму ў Беларусі».

Гаворачы аб заканадаўчых планах, Ігар Сергяенка сярод іншага паведаміў медыцынскай супольнасці аб тым, што сёлета дэпутаты Палаты прадстаўнікоў чакаюць паступленне праекта Кодэкса «Аб ахове здароўя».

Старшыня Палаты прадстаўнікоў адзначыў, што наперадзе — вялікая праца з дакументам, і парламентарыі разлічваюць на дапамогу практыкаў для таго, каб на выхадзе дакумент быў сапраўды рабочым.

Калектыў Докшыцкай ЦРБ адразу ўключыўся ў абмеркаванне тэмы. З залы паступіла некалькі прапаноў, якія датычыліся работы медыцынскага персаналу і замацавання маладых супрацоўнікаў на месцах.

Выканальныя задачы

Фінальным пунктам на маршруце спікера стала азнаямленне з будаўніцтвам малочнатаварнага комплексу «Ветэра» ААТ «Таргуны». Падводзячы вынікі паездкі, у размове з журналістамі Старшыня Палаты прадстаўнікоў адзначыў, што Докшыцкі раён дынамічна развіваецца.

— У першым квартале выканана 10 з даведзеных 12 паказчыкаў, павялічваюцца інвестыцыі ў асноўны капітал, якія на 145 % выраслі сёлета. На працягу апошніх двух-трох гадоў рэалізаваныя два праекты, якія стварылі дадаткова да сотні працоўных месцаў, з’явіліся новыя вытворчасці, якія сёння працуюць, — канкрэтызаваў Ігар Сергяенка.

Акрамя таго, гаворка ішла ў тым ліку і аб развіцці прамысловай вытворчасці. Так, па словах спікера, былі вызначаны шляхі далейшага павышэння ўзроўню прадпрыемства «Ветразь», рэалізацыі прадукцыі і росту прыбытку прадпрыемства.

Закрануў спікер Палаты прадстаўнікоў і тэму сельскай гаспадаркі. Ігар Сергяенка канстатаваў, што сёння на Віцебшчыне фактычна завяршаюцца пасяўныя работы.

— Дастаткова арганізавана прайшла пасяўная кампанія, — даў станоўчую ацэнку ён. — У цэлым я хацеў бы сказаць, што Докшыцкі раён уваходзіць у лік лепшых сямі раёнаў Віцебскай вобласці па ўзроўні развіцця, па тэмпах, па тэхналогіі вытворчасці. Сёння мы паглядзелі на будаўніцтва малочнатаварнага комплексу, а таксама рэалізацыю новага праекта для ўтрымання маладняку. Гэта цікавы праект, які будзе рэалізаваны ў найбліжэйшы час. Сам малочнатаварны комплекс запрацуе да канца года. Гэта тая вытворчасць, за якой сёння будучыня і перспектывы развіцця раёна.

Плануецца, што на тэрыторыі раёна пабудуюць яшчэ некалькі такіх таварных комплексаў. Каментуючы жорсткую нараду кіраўніка дзяржавы па Віцебскай вобласці, спікер Палаты прадстаўнікоў падкрэсліў:

— Дасягнуць сур’ёзнага аднамомантавага зруху вельмі складана. І тады шмат у чым адзначалася, што галоўнае — дамагчыся змены свядомасці ў дачыненні да людзей. Так, сёння Віцебшчына, напэўна, паволі пачынае выбірацца з усіх праблем. Калі гаварыць нават пра сённяшнюю зводку па вытворчасці малочнай прадукцыі, то паступова ўжо займае ўпэўненае чацвёртае месца па надоях.

Стабілізавалася сітуацыя і з падзяжом жывёлы. Хацелася б, каб гэта стала не проста тэндэнцыяй, а трывалым падыходам, трэндам.

Акрамя таго, як адзначыў Ігар Сергяенка, прымаюцца меры па навядзенні парадку на зямлі, у сельскагаспадарчых вытворчасцях, праводзіцца рэструктурызацыя перапрацоўчай прамысловасці з задзейнічаннем інвестараў з іншых рэгіёнаў краіны.

— Гэта датычыцца і Аршанскага, і Полацкага раёнаў, і непасрэдна Віцебска. Гэта значыць, адбываюцца структурныя змены. Мяняюцца і падыходы кіраўнікоў на месцах, і адносіны насельніцтва. Ёсць упэўненасць, што Віцебшчына з усімі тымі задачамі, якія паставіў кіраўнік дзяржавы, справіцца, дзякуючы працы ўсіх.

Падрыхтаваў Данііл ХМЯЛЬНІЦКІ

Фота ТГ-канала Палаты прадстаўнікоў