Прадстаўнікі дзяржорганаў, прафсаюзаў, навуковай супольнасці абмеркавалі актуальныя пытанні развіцця сістэмы сацыяльнага партнёрства ў сферы працы ў Саюзнай дзяржаве і выпрацавалі рэкамендацыі па далейшым удасканаленні работы ў гэтым напрамку.

Лідэр нацыянальнага прафцэнтра акцэнтаваў увагу: семінар праходзіць напярэдадні знакавай даты. 15 ліпеня спаўняецца 30 гадоў з моманту падпісання Прэзідэнтам нашай краіны ўказа «Аб развіцці сацыяльнага партнёрства ў Рэспубліцы Беларусь».

— Сёння мы на практыцы бачым, што гэты дакумент не толькі стаў асновай сістэмнага і канструктыўнага дыялогу ўрада, прафсаюзаў і наймальнікаў нашай краіны. Але і паслужыў апорай для фарміравання дзяржавы, у якой усе найважнейшыя рашэнні ўлічваюць інтарэсы чалавека працы, — падкрэсліў Юрый Сянько.

Падпісанне Генеральнага і тарыфных пагадненняў, заключэнне калектыўных дагавораў, удзел прафсаюзаў ва ўдасканаленні заканадаўства — гэта ўжо сталыя механізмы, якія даказалі сваю эфектыўнасць. І сёння яны служаць не толькі павышэнню дабрабыту членаў працоўных калектываў, але і вырашэнню актуальных пытанняў у працоўнай сферы ў цэлым.

— Так, у новае Генеральнае пагадненне на 2025 — 2027 гады па ініцыятыве ФПБ уключаны навацыі, накіраваныя на павышэнне прэстыжу рабочых прафесій, стымуляванне замацаванасці работнікаў на працоўных месцах, развіццё настаўніцтва, падтрымку моладзі, работнікаў з сямейнымі абавязкамі і інш. Сёння ўсе гэтыя пазіцыі знаходзяць адлюстраванне ў тарыфных пагадненнях і калектыўных дагаворах і працуюць на вырашэнне пытання замацавання кадраў, — прывёў прыклад Юрый Сянько

Рэалізаваная прапанова ФПБ аб зняцці абмежаванняў на выплату пенсій працуючым пенсіянерам не толькі аднавіла справядлівасць для людзей, але і стымулюе вопытных работнікаў працягваць сваю працоўную дзейнасць, што ва ўмовах пэўнага дэфіцыту кадраў таксама адыгрывае важную ролю. А навацыі, накіраваныя на падтрымку моладзі (увядзенне падатковай ільготы для маладых спецыялістаў, павелічэнне памеру выплат па «бальнічных лістах» для маладых работнікаў) садзейнічаюць паляпшэнню становішча моладзі на рынку працы і, адпаведна, павышэнню яе зацікаўленасці ў легальнай і стабільнай працоўнай дзейнасці.

Сёння прафсаюзы Беларусі сумесна з сацыяльнымі партнёрамі працуюць над далейшым удасканаленнем заканадаўства. У прыватнасці, прадстаўнікі Федэрацыі прафсаюзаў уваходзяць у склад рабочай групы па падрыхтоўцы праекта закона змяненняў і дапаўненняў у Працоўны кодэкс і ўносяць прапановы ў інтарэсах людзей і дзяржавы ў цэлым.